လွန်ခဲ့သောနှစ်များစွာက ကျွန်ုပ်၏သားများနှင့်အတူ အိုင်ဒါဟိုပြည်နယ်မြောက်ပိုင်းရှိ Selway – Bitterroot တောအတွင်း ရက်အနည်းငယ်ခန့် ညအိပ်စခန်းချသွားခဲ့သည်။ ကြောက်မက်ဖွယ်ကောင်းသောမြောက်အမေရိကဝက်ဝံများ နေထိုင်ကျက်စားရာအရပ် ဖြစ်သဖြင့် ကျွန်တော်တို့ ဝက်ဝံခြောက်လှန့်ရန် စပရေးဆေးဗူးများ ယူဆောင်သွားသလို စခန်းချသည့်နေရာကို သန့်ရှင်းစွာထားကာ ဝက်ဝံများနှင့် မတွေ့ရန် မျှော်လင့်ခဲ့ကြသည်။

ညလယ်တစ်ညတွင်မူ ရဲန်ဒီ၏အော်သံကို ကြားလိုက်ရပြီး သူ၏ညအိပ်အိတ် (sleeping bag)အတွင်းမှ ထွက်ရန် ကြိုးစားနေသောအသံကို ကြားလိုက်သည်။ လက်နှိပ်မီးသီးကို ယူ၍ မီးထိုးလိုက်ကာ ဒေါသထွက်နေမည့် ဝက်ဝံကြီးကို တွေ့ရ မည်ဟု ထင်မိသည်။

သို့သော် နောက်ခြေဖြင့်ရပ်ပြီး ရှေ့ခြေများက လေထဲမြောက်နေသော ၄လက်မ အရွယ် လယ်ကြွက်တစ်ကောင်ကို တွေ့လိုက်ရသည်။ သကောင့်သားက ရဲန်ဒီ၏ လျှာထိုးဦးထုပ်လေးကို သူ့သွားလေးများဖြင့် ကျစ်ကျစ်ပါအောင် ကိုက်ထားပြီး ရဲန်ဒီဦးခေါင်းမှ ဦးထုပ်မကျွတ်မချင်း ဆွဲနေခဲ့သည်။ ကျွန်တော်လည်း ရယ်လိုက်ရာ ကြွက်လေးက ဦးထုပ်ကိုလွတ်ကာ ပြေးသွားတော့သည်။ ကျွန်တော်တို့လည်း ကိုယ့် ညအိပ်အိတ်များအတွင်းသို့ ပြန်ဝင်ခဲ့ကြသည်။ ကျွန်တော်အင်မတန်မှ စိတ်လှုပ်ရှားခဲ့ သောကြောင့် တော်တော်နှင့် ပြန်မအိပ်နိုင်ဘဲ အခြားသူရန်သူတစ်မျိုးဖြစ်သော မာရ်နတ် အကြောင်းကို တွေးနေမိသည်။

သခင်ကို စုံစမ်းခဲ့သော စာတန်၏စုံစမ်းနှောင့်ယှက်ခြင်းအကြောင်းကို ဆင်ခြင်ကြည့်ပါ (မ ၄:၁-၁၁)။ သခင်က နှုတ်ကပတ်တော်ဖြင့် တုံ့ပြန်ရင်ဆိုင်ခဲ့သည်။ ဖြားယောင်း သည့် အကြောင်းချင်းရာတစ်ခုစီနှင့်ပတ်သက်ပြီး ဘုရားသခင် မိန့်ကြားသည့်စကားကို နှလုံးသွင်းလျက် ကိုယ့်ကိုယ်ကိုယ်သတိပေးလျက် သခင်ယေရှုတုံ့ပြန်ကာ စာတန်၏ စကားကို မနာခံခဲ့ပါ။ ထို့ကြောင့် မာရ်နတ် ထွက်ပြ​ေးရတော့သည်။

စာတန်သည် ကျွန်ုပ်တို့ကို ဖျက်ဆီးဝါးမျိုပစ်ချင်သော်လည်း သူသည် ကြွက်လေးကဲ့သို့ပင် ဖန်ဆင်းခံသတ္တဝါသာဖြစ်ကြောင်းကို အမှတ်ရသင့်သည်။ ယောဟန်က “ငါတို့ဘက်၌ ရှိသောသူသည် လောက၌ရှိသောသူထက်သာ၍ကြီးတော်မူ၏” ဟု မိန့်မြွက်ခဲ့ ပါသည် (၁ယော ၄:၄)။ DAVID H. ROPER