သက္ကရာဇ် ၁၉၇၉ ခုနှစ်တွင် ဒေါက်တာ ဂေးဘရယ်ဘာကေးနှင့်အဖွဲ့သည် ရှေးဟောင်း ဂျေရုဆလင်မြို့၏အပြင်ဘက်တစ်နေရာတွင် မြှုပ်ထားသော ငွေစက္ကူလိပ် နှစ်ခုကို ရှာဖွေ တွေ့ရှိ ခဲ့ကြသည်။ ၎င်းကို သေချာစွာ ဂရုတစိုက် သုသေတနပြုမှုအပြီး သက္ကရာဇ် ၂၀၀၄ ခုနှစ်၊ ၂၅ နှစ်အကြာတွင် ထိုစက္ကူလိပ်နှစ်ခုသည် ဘီစီ ၆၀၀ ကတည်းကပင် မြှုပ်ထားခြင်းခံထားရသော သက်တမ်းအကြာမြင့်ဆုံး တည်ရှိ နေသော သမ္မာကျမ်းစာများအဖြစ် သုသေတီများက အတည်ပြု ခဲ့ကြသည်။ ထိုစာလိပ်များတွင် အထူးစိတ်၀င်စားဖွယ် ကျွန်မတွေ့ရှိသည့်အချက်မှာ ဆရာတော်များနှင့် ဘုန်းတော်ကြီးများ ကောင်းချီးပေးသကဲ့သို့ ဘုရားသခင်သည် သူ၏လူတို့ကို မိန့်ကြားလိုသည့် အချက်ဖြစ်သည်။ “ထာဝရဘုရားသည် သင့်ကို ကောင်းချီးပေး၍ (သင့်ကို)စောင်မတော်မူပါစေသော်။ ထာဝရ ဘုရားသည် သင်၏မျက်နှာတော်အလင်းကိုလွှတ်၍ (သင်၌)ကရုဏာကျေးဇူးပြုပါစေသော် ” (တော ၆:၂၄-၂၅)။

ဘုရားသခင်သည် (မောရှေအားဖြင့်) အာရုန်နှင့်သူ၏သားများအား ဤကောင်းချီး ဆု​တောင်းကို ​ပေးအပ်ပြီး သူ့ကိုယ်စား လူအပေါင်းအား မည်သို့ ကောင်းချီး ပေးရမည်ကို ပြသခဲ့သည်။ ခေါင်းဆောင်များသည် ထိုဆု​တောင်းကို အာဂုံဆောင် အလွတ် ရွတ်ထားရသည်။ သို့မှသာ ဘုရားသခင်အလိုတော်ရှိသည့် ပုံစံအတိုင်း လူအများကို ကောင်းချီး ပေးနိုင်မည် ဖြစ်သည်။ ဤကျမ်းပိုဒ်တွင် “ထာဝရဘုရား” ဟူသည့် စကားလုံး ၃ကြိမ်ပါရှိပြီး ကိုယ်​တော်တစ်ပါးတည်းသာလျှင် ကောင်းချီးပေးသောဘုရား ဖြစ်ကြောင်းကို အလေးအနက်ပြုသည်။ သို့သော် အင်္ဂလိပ်ကျမ်းစာတွင် “သင့်ကို/သင့်အား”ဟူသည့် စကားလုံး ၆ ကြိမ်ပါရှိပြီး ဘုရားရှင်သည် သူ၏မေတ္တာ​တော်နှင့် မျက်နှာသာပေးမှုကို သူ့လူများအား အဘယ်မျှလက်ခံစေလိုသည်ကို ထင်ဟပ်ပြနေသည်။

ကောင်းချီးပေးလိုသည့် ဘုရားသခင်၏ဆန္ဒကို ဖော်ပြသည့် သက်တမ်းအရင့်ဆုံး တည်ရှိနေသော သမ္မာကျမ်းအစိတ်အပိုင်းလေးကို ခေတ္တမျှ ဆင်ခြင်တွေးကြည့်ပါ။ ၎င်းသည် ဘုရားသခင်၏ အကန့်သတ်မဲ့မေတ္တာနှင့် ကိုယ်တော်သည် ကျွန်မတို့နှင့်အလွန် မိတ်သဟာယဖွဲ့လိုခြင်းကို သတိပေးအမှတ်ရစေသည်။ သင်သည် ဘုရားသခင်နှင့်ဝေးကွာ နေသည်ဟု ခံစားနေရလျှင် ဤရှေးကတိတော်ကို မြဲစွာ ကိုင်စွဲပါ။ ထာဝရဘုရားသည် သင့်အား ကောင်းချီးပေး၍ (သင့်ကို) စောင်မတော်မူပါစေသော်။ AMY BOUCHER PYE