Tsundoku။ ကျွန်မအမြဲလိုအပ်သောစကားလုံးလေးဖြစ်ပါသည်။ ဂျပန်ဝေါဟာရ ဖြစ်ပြီး ဖတ်မည့်သူကိုစောင့်နေသည့် ကုတင်ဘေးရှိစားပွဲတွင်တင်ထားသော စာအုပ် များကို ဆိုလိုပါသည်။ စာအုပ်စာပေများသည် သင်ယူရန်အခွင့်အလမ်း​ကိုပေးသည်။ စိတ်ထွက်ပေါက်တစ်ခုလည်းဖြစ်သည်။ စာမျက်နှာများမှရရှိသည့် ဝမ်းမြောက်မှုနှင့် အတွေးအမြင်များကို ကျွန်မတောင့်တသည်။ ထိုကြောင့် စာအုပ်ပုံကြီး ဆက်လက် ရှိနေခြင်းဖြစ်ပါသည်။

ဝမ်းမြောက်မှုနှင့်အကူအညီကို စာအုပ်များမှရနိုင်သည်ဟုဆိုလျှင် စာအုပ်ထိပ်ခေါင် သမ္မာကျမ်းစာမှဆိုလျှင် ပို၍ပင်မှန်နေတော့သည်။ လူမျိုးတော်ကို ကတိတော်ပြည်သို့ ပို့ဆောင်ရန်စေခိုင်းခံရသူ ဣသရေလလူတို့၏ခေါင်းဆောင်သစ်ယောရှုအား ဘုရားရှင် ပေးအပ်ခဲ့သော လမ်းညွှန်မှုများပါဝင်သောကျမ်းစာတွင် နစ်မျောပျော်ဝင်ရန် အားပေးနေမှု ကိုကျွန်မခံစားရသည် (ယောရှု ၁:၈)။

ရှေ့တွင်ရှိသောအခက်အခဲများကို သိသောကြောင့် ဘုရားရှင်က ယောရှုအား သင်နှင့် အတူရှိမည် (:၅) ဟုစိတ်ချမှုပေးခဲ့သည်။ ဘုရားသခင်၏ပညတ်တော်များကို ယောရှု နာခံခြင်းအားဖြင့် အထံတော်မှကူညီမစမှုများရလိမ့်မည်။ ထို့ကြောင့် ဘုရားသခင်က သူ့အား “ထိုပညတ္တိကျမ်းစာ၌ရေးထားသမျှအတိုင်း ကျင့်မည်ဟု စောင့်ရှောက်ခြင်းအလိုငှာ ကျမ်းစာကိုမဖတ်မရွတ်ဘဲမနေ၊ နေ့ညဉ့်မပြတ် ကြည့်ရှုဖတ်ရွတ်ရမည်”(:၈) ဟုမိန့်ကြား ခဲ့သည်။ ပညတ္တိကျမ်းရှိပြီးသားဖြစ်သော်လည်း ဘုရားရှင်သည် မည်သို့သောဘုရား ဖြစ်သည်၊ လူမျိုးတော်အတွက် မည်သည့်ကတိတော်များရှိထားသည်ကိုသိပြီး နက်နဲသော ဆိုလိုရင်းများကို နားလည်အောင် ထိုကျမ်းကို ပုံမှန် လေ့လာဖတ်ရှုရန်လိုပါသည်။

သင်လည်း ဘုရားရှင်၏လမ်းညွန်ပို့ဆောင်မှု၊ သမ္မာတရားနှင့် သင့်နေ့ရက်များ အတွက် တိုက်တွန်း ခွန်အားပေးမှု လိုအပ်ပါသလား။ အချိန်ယူပြီး ကျမ်းစာကိုဖတ်ရှုနာခံကာ နှုတ်ကပတ်တော်မှခွန်အားရယူလျှင် စာမျက်နှာတိုင်း၌ပါဝင်သောအရာများကို အရသာ ရှိရှိသုံးဆောင်နိုင်မည်ဖြစ်သည် (၂ တိ ၃:၁၆)။ LISA M. SAMRA