၂၀၁၂ ခုနှစ်တွင် Philips, Craig နှင့် Dean သည် “Tell Your Heart to Beat Again” ဟူသည့် သူတို့၏သီချင်းကို ထုတ်လွှင့်ခဲ့သည်။ ထိုသီချင်းသည် နှလံုးခွဲစိတ် ဆရာဝန်တစ်ဉီး၏ဖြစ်ရပ်မှန်ကိုအခြေခံပြီး ရေးစပ်ထားသည်။ လူနာ၏နှလံုးကို ခွဲစိတ်ပြုပြင်ပြီးနောက် ခွဲစိတ်ဆရာဝန်သည် နှလံုးကို ရင်ဘတ်ထဲပြန်ထည့်ပြီး အသက်ပြန်ဝင်လာစေရန် ဖြေးညှင်းစွာ စတင်ဖိနှိပ်ပေးသည်။ သို့သော် နှလံုးသည် ပြန်လည်အလုပ်မလုပ်ပါ။ ပိုမို ပြင်းထန်စွာဖိနှိပ်ပေးပြီးနောက်တွင်လည်း နှလံုးသည် ပြန်လည်မခုန်သေးပါ။ နောက်ဆံုးတွင် ခွဲစိတ်ဆရာဝန်က သတိမေ့နေသောလူနာ အနီး၌ ဒူးထောက်လိုက်ပြီး သူမကို “မစ်ဂျွန်ဆင်၊ အခု မင်းကို ခွဲစိတ်ပေးတဲ့ ဆရာဝန် စကားပြောနေတာပါ။ ခွဲစိတ်မှု ကောင်းစွာ ပြီးဆံုးသွားပါပြီ။ မင်းရဲ့ နှလံုးသားကို လည်း ခွဲစိတ်ကုသပြီးပါပြီ။ အခု မင်းနှလံုးကို ခုန်ဖို့ပြောလိုက်ပါ” ဟု ပြောခဲ့သည်။ ထိုနောက် သူမနှလံုး စတင်ခုန်လာခဲ့သည်။

ကျွန်ုပ်တို့၏ရုပ်ခန္ဓာရှိနှလံုးကို တစ်ခုခုလုပ်ရန် ပြော၍ရသည်ဟူသောအတွေး က အထူးအဆန်းဖြစ်နေမည်။ သို့သော် ဝိညာဉ်ရေး၌ ထိုသဘောမျိုးရှိသည်။ “အို ငါဝိညာဉ်၊ သင်သည် အဘယ်ကြောင့်ညှိုးငယ်သနည်း။…ဘုရားသခင်ကို မျှော်လင့် လျက်နေလော့”(ဆာ ၄၂:၅)ဟု ဆရာလံဆရာက သူ့ကိုယ်သူ ပြောသည်။ တစ်ဖန် “အိုငါ့ဝိညာဉ်၊ သင်၏ငြိမ်ဝပ်ရာသို့ ပြန်လော့။ ထာဝရဘုရားသည် သင်၌ ကျေးဇူးပြုတော်မူပြီ”(၁၁၆:၇) ဟု ဆိုပြန်သည်။ စစ်ပွဲ၌ ဣသရေလတို့၏ရန်သူကို နှိမ်နင်းပြီးနောက် အမျိုးသမီးတရားသူကြီး ဒေဗောရက တိုက်ပွဲအတွင်း၌ “အို ငါ့ဝိညာဉ်၊ သင်သည် ခွန်အားကြီးသောသူကို နှိပ်နင်းပြီ” (တရား ၅:၂၁)၊ “ဘုရားသခင်သည် အောင်မြင်ခြင်းအခွင့်ကို ကတိထားတော်မူပြီ” (တရား ၄:၆-၇)ဟု သူမ၏နှလံုးကို စကားပြောခဲ့ကြောင်း ဖော်ပြခဲ့သည်။

တတ်စွမ်းသော သမားတော်ကြီးဘုရားရှင်သည် ကျွန်ုပ်တို့၏ရောဂါရှိသမျှကို ပျောက်စေတော်မူပြီ(ဆာ ၁၀၃:၃)။ ထိုကြောင့် စိုးရွံ့မှု၊ စိတ်ဓာတ်ကျမှု (သို့) အပြစ် တင်ခံရသောအခါ၊ မိမိ၏စိတ်ဝိညာဉ်အား “ဆက်သွားပါ။ ကြံ့ကြံ့ခံပါ။ အားနည်း သောနှလံုးသား၊ ထပ်မံခုန်လိုက်ပါ” ဟု ပြောသင့်သည်။ SHERIDAN VOYSEY