ရုရှားလူမျိုးတို့၏မင်္ဂလာဆောင်ဓလေ့သည် အလွန်လှပခန့်ညားသည်။ ဧည့်ခံပွဲတွင် ဓလေ့တစ်ခုမှာ မင်္ဂလာမောင်နှံအား ဂုဏ်ပြုရန်အတွက် ဧည့်ပရိသတ်များ ဖန်ခွက်ကိုအပေါ်သို့မြှောက်ကြရန် မင်္ဂလာအခမ်းအနားမှူးက ကြေညာလိုက်သည်။ ဧည့်သည်အားလုံးသည် မြှောက်ထားသောဖန်ခွက်ထဲမှ ဖျော်ရည်တစ်ငုံသောက်ပြီး ရုရှားဘာသာဖြင့် “ဂေါ်ကို ဂေါ်ကို” ဟုအော်ဟစ်ကြသည်။ “ခါးသည် ခါးသည်” ဟု အဓိပ္ပာယ်ရသည်။ ထိုအခါ မင်္ဂလာမောင်နှံတို့သည် မတ်တပ်ရပ်ပြီး ဖျော်ရည် ပြန်ချိုမြလာစေရန် တစ်ဦးနှင့်တစ်ဦး နမ်းခြင်းဖြင့် ပြန်လည်တုံ့ပြန်ကြသည်။

ပရောဖက်ဟေရှာယက ကမ္ဘာပေါ်သို့ ကျရောက်မည့်ပျက်စီးခြင်းနှင့် ကျိန်ဆဲခြင်းကဲ့သို့သော ခါးသီးခြင်းစပျစ်ရည်(အခန်းကြီး ၂၄)၊ကောင်းကင်သစ်နှင့် မြေကြီးသစ်ဟူသော ချိုမြသည့်မျှော်လင့်ခြင်း(အခန်းကြီး ၂၅)အတွက် လမ်းခင်းပေး မည်ဟု ပရောဖက်ပြုခဲ့သည်။ ထာဝရဘုရားသည် အရသာရှိသော စားဖွယ်စုံ၊ အကောင်းဆုံးနှင့် အချိုမြဆုံးသော သောက်စရာတို့ကို ပြင်ဆင်ထားမည်။ အစဉ်သဖြင့် ရရှိခံစားရမည့်ကောင်းချီးဖြစ်သည့် ဆူသောခဲဘွယ်စားဘွယ်၊ ကောင်းမွန်စွာ စစ်သောစပျစ်ရည်ဟောင်းကို လူခပ်သိမ်းတို့အဘို့ စီရင်တော်မူသည် (၂၅:၆)။ ရှိပါသေးသည်။ ဖြောင့်မတ်သောသခင်၏အုပ်စိုးမှုအောက်တွင် သေခြင်းကို ရှုံးစေပြီး၊ ခပ်သိမ်းသောမျက်ရည်ကို သုတ်တော်မူလျက် ကိုယ်တော်၏ လူတို့ ခံရသောကဲ့ရဲ့ခြင်းကိုလည်း မြေကြီးတစ်ပြင်လုံး၌ ပယ်ရှင်းတော်မူလိမ့်မည် (:၇-၈)။ ထို့ပြင် သူတို့ယုံကြည်ကိုးစား၍ မျှော်လင့်စောင့်စားသောသခင်သည် သူတို့အား ကယ်တင်တော်မူပြီး သူတို့ဘဝ၏ခါးသီးသောခွက်တို့ကို ပြန်လည် ချိုမြစေမည်ဖြစ်၍ လူအပေါင်းတို့သည် ဝမ်းမြောက်ကြသည် (:၉)။

တစ်နေ့တွင် သိုးသူငယ်၏မင်္ဂလာညစာစားပွဲတွင် သခင်ယေရှုနှင့် ကျွန်ုပ်တို့ ပြန်လည်ဆုံစည်းကြမည်။ သူ၏သတို့သမီး(အသင်းတော်)ကို သခင်ကြိုဆိုချိန်၌ ‘ဟေရှာယ ၂၅’မှ ကတိတော်ပြည့်စုံလိမ့်မည်။ တစ်ချိန်က ခါးသီးသော အသက်တာသည် ပြန်လည်ချိုမြလာလိမ့်မည်။ MARVIN WILLIAMS