“ဘုရားသခင် ဘယ်မှာနေလဲဆိုတာ သားသိတယ်”ဟု ၄နှစ်အရွယ် မြေးလေးက ပြောရာ ကျွန်တော့်ဇနီးကာရီက သိလိုစိတ်ဖြင့် “ဘယ်မှာနေတာတုံး” ဟု မေးလိုက်သည်။ “အဘွားရဲ့အိမ်ဘေးနားက တောအုပ်ထဲမှာနေတယ်”ဟု သူပြန်ဖြေသည်။

ထိုအကြောင်းကို ကာရီက ကျွန်တော့်ကိုပြန်ပြောရင်း ထိုအတွေးမျိုး မြေးလေး ဘယ်ကရလာပါလိမ့်ဟု တွေးမိသည်။ “ငါသိပြီ။ သူနောက်ဆုံးတစ်ခါ လာလည်တုန်းက တို့မြေးဖိုးနှစ်ယောက် တောအုပ်ထဲလမ်းလျှောက်ထွက်ပါရောလား။ ဘုရားသခင်ကို မမြင်နိုင်ပေမယ့် ဘုရားဖန်ဆင်းတဲ့အရာတွေအားဖြင့် ဘုရားကို မြင်နိုင်တယ်လို့ သူ့ကိုပြောပြခဲ့တယ်”။ မြစ်ကမ်းဘေး သဲသောင်ပေါ် လမ်းလျှောက်ရင်း “ဘိုးဘိုးရဲ့ခြေရာတွေကို တွေ့လား။ တိရစ္ဆာန်တွေ၊ သစ်ပင် တွေနဲ့ မြစ်ချောင်းတွေဟာ ဘုရားသခင်ရဲ့ခြေရာနဲ့တူတယ်။ ဘုရားဖန်ဆင်း ထားတဲ့ အရာတွေကို မြင်တွေ့နိုင်တဲ့အတွက် ဘုရားသခင် ဒီနေရာမှာရှိတာကို ဘိုးဘိုးတို့ သိနိုင်တယ်”ဟုပြောပြဖူးကြောင်း ကာရီအား ကျွန်တော်ပြောပြသည်။

၁၀၄ ခုမြောက်သောဆာလံကိုရေးသည့် ဆာလံဆရာကလည်း “အိုထာဝရ ဘုရား၊ ကိုယ်တော်စီရင်ပြုပြင်တော်မူသောအရာတို့သည် အလွန်များပြားပါ၏။ ရှိရှိသမျှတို့ကို ပညာတော်အားဖြင့် ဖန်ဆင်းတော်မူ၏။ မြေကြီးသည် ဘဏ္ဍာတော်နှင့်ကြွယ်ဝပါ၏”(:၂၄)ဟု ကြွေးကြော်ပြီး ဘုရားသခင်ရှိကြောင်း ဖန်ဆင်းခြင်း လက်ရာသက်သေများကို ထောက်ပြသည်။ ဤကျမ်းချက်မှ ပညာတော် ဟူသော ဟေဗြဲစကားလုံးကို ပြောင်မြောက်လှသည့် လက်မှုစွမ်းရည်ကို ဖော်ပြရန် ကျမ်းစာ ၌ မကြာခဏသုံးနှုန်းသည်။ သဘာဝတရားရှိ ဘုရားရှင်၏လက်ရာများက ဘုရား သခင်၏တည်ရှိမှုကို ကြွေးကြော်လျက် သခင့်အား ချီးမွမ်းချင်အောင် မစသည်။

ဆာလံ ၁၀၄ ကို “ထာဝရဘုရားကို ကောင်းချီးပေးလော့” ဟု အစပြုပြီး ထိုအတိုင်း အဆုံးသတ်ထားသည် (:၁၊ ၃၅)။ ကလေးငယ်၏လက်မှအစလင်းယုန်ငှက်၏မျက်လုံးအထိ ဖန်ဆင်းရှင်၏အနုပညာတော်သည် ကျွန်ုပ်တို့ ပတ်လည်၌ရှိနေပြီး ကိုယ်တော်၏ပြောင်မြောက်သောကျွမ်းကျင်မှုကို ကြားပြော နေသည်။ ယနေ့တွင် ထိုအရာအားလုံးကို အံ့သြမှင်သက်ပြီး ၎င်းတို့အတွက် ကိုယ်တော်အား ချီးမွမ်းကြပါစို့။ JAMES BANKS