အမေရိကန်ပြည်တွင်းစစ်ကာလက တပ်မှထွက်ပြေးလျှင် သေဒဏ်အပြစ်ပေးခံရသည်။ သို့သော် တပ်ပေါင်းစုက ဝရမ်းပြေးများကို သတ်ဖြတ်ခဲ့ခြင်းမရှိပါ။ အဘယ်ကြောင့်ဆိုသော် ၎င်းတို့၏စစ်သေနာပတိ အာဗြံဟံလင်ကွန်းက ထိုသူတို့ အားလုံးနီးပါးကို ခွင့်လွှတ်ခဲ့သောကြောင့်ဖြစ်သည်။ လင်ကွန်း၏သက်ညှာမှုသည် ဝရမ်းပြေးများကို သွေးဆောင်ခြင်းဖြစ်သည်ဟု ယုံကြည်သည့် စစ်ဘက်ဆိုင်ရာ ဝန်ကြီး အက်ဒဝင် စတက်နန်က ထိုကိစ္စကြောင့် အမျက်ထွက်ခဲ့သည်။ သို့သော် တိုက်ပွဲပြင်းထန်ချိန်တွင် စိတ်ဓာတ်ပျက်စီးပြီး တုန်လှုပ်ခြောက်ခြားစွာခံစားရလျက်၊ ကြောက်ရွံ့မှု၌ကျရှုံးသွားသူ စစ်သည်များအပေါ် လင်ကွန်းက ထပ်တူခံစားပေးခဲ့သည်။ သူ၏စာနာမှုက စစ်သည်များနှင့်သူ့ကို ပို၍အစေးကပ်ချစ်ခင်စေသည်။ “အဘလင်ကွန်း”ကို စစ်သည်တို့ အလွန်ချစ်မြတ်နိုးပြီး ထိုချစ်စိတ်ကြောင့် လင်ကွန်း၏လက်အောက်၌ သူတို့တိုး၍တာဝန်ထမ်းဆောင်လိုစိတ် ဖြစ်ခဲ့သည်။

ရှင်ပေါလုသည် တိမောသေအား သူနှင့်ပူးပေါင်းရန် “ယေရှုခရစ်ထံ၌ ကောင်းသောစစ်သူရဲကဲ့သို့ ဆင်းရဲဒုက္ခကို သည်းခံလော့” (၂ တိ ၂:၃) ဟုခေါ်သောအခါ ၎င်းအား အလွန်ခက်ခဲသောအမှုတော်အတွက် ခေါ်ခြင်းဖြစ်သည်။ စစ်သည်တစ်ဉီးသည် သူ့အသက်ကို အကြွင်းမဲ့စွန့်လွှတ်ရမည်။ ကြိုးစားရမည်၊ အတ္တကင်းရမည်။ စစ်သေနာပတိ ယေရှုအား စိတ်နှလုံးအကြွင်းမဲ့ အစေခံရမည်။ သို့သော် လက်တွေ့တွင် ကျွန်ုပ်တို့သည် သခင်၏စစ်သူရဲကောင်းမဖြစ်၊ အစဉ်သစ္စာရှိစွာ အစေမခံပါ။ ထို့ကြောင့် ရှင်ပေါလု၏ “ကျေးဇူးတော်အားဖြင့် ခိုင်ခံ့ခြင်း ရှိလော့”(:၁) ဟု အစချီ ဖွင့်လိုက်သည့်အချက်က အရေးကြီးပါသည်။ ကျွန်ုပ်တို့၏ ကယ်တင်ရှင်သည် ကျေးဇူးတော်နှင့် ကြွယ်ဝပြည့်စုံသူဖြစ်သည်။ ကျွန်ုပ်တို့၏ အားနည်းချက်ကို စာနာပေးပြီး ကျွန်ုပ်တို့၏ ပျက်ကွက်မှုများကို ခွင့်လွှတ်ပေးသည် (ဟေဗြဲ ၄:၁၅)။ တပ်ပေါင်းစုမှ စစ်သည်များသည် လင်ကွန်း၏ ကရုဏာအားဖြင့် အားပေးမစမှုခံရသကဲ့သို့ ယုံကြည်သူများကိုလည်း သခင်ယေရှု၏ ကျေးဇူးတော်အားဖြင့် ခိုင်ခံ့စေသည်။ ကျွန်ုပ်တို့ကို သခင်ချစ်တော်မူကြောင်း သိခြင်းကြောင့် ကိုယ်တော်အား တိုး၍အစေခံချင်ပါသည်။ CON CAMPBELL