ကျွန်မ၏ဖခင်သည် ဓမ္မသီချင်းဟောင်းများ သီဆိုရခြင်းကို နှစ်သက်သည်။ သူ့အကြိုက်သီချင်းတစ်ပုဒ်မှာ “In the Garden”(ဥယျာဉ်ထဲ၌) ဖြစ်သည်။ လွန်ခဲ့သည့်နှစ်အနည်းငယ်က သူ၏ဈာပနတွင် ကျွန်မတို့ ထိုသီချင်းကို သီဆိုခဲ့သည်။ ထပ်ကျော့သီဆိုရန်အပိုဒ်မှာ ရိုးရှင်းသည်။ “ကျွန်ုပ်နှင့်အတူ လျှောက်လှမ်းလျက်၊ စကားပြောလျက်၊ ကျွန်ုပ်ကို သူပိုင်ကြောင်းဆိုပေ။ ထိုနေရာ၌ လျှောက်လှမ်းစဥ် ကိုယ်တော်နှင့်မျှဝေသော ဝမ်းမြောက်ခြင်းကို မည်သူမျှမသိ နားမလည်နိုင်ပြီ။” ထိုသီချင်းက အဖေ့ကိုသာမက ကျွန်မကိုလည်း ဝမ်းမြောက်စေသည်။

ဓမ္မတေးရေးဆရာ C. Austin Miles က ၁၉၁၂ ခုနှစ် နွေဦးအချိန်တွင် ရှင်ယောဟန်ခရစ်ဝင်ကျမ်း အခန်းကြီး ၂၀ ကို ဖတ်ရှုပြီးနောက် ဤသီချင်းကို ရေးစပ်ခဲ့ကြောင်း ဆိုပါသည်။ “အဲဒီနေ့က ဒီကျမ်းပိုဒ်ကိုဖတ်တဲ့အခါ ကျွန်တော် လည်း အဲဒီနေရာမှာ ရောက်ရှိနေသလို ခံစားခဲ့ရတယ်။ မာရိက သခင့်ရှေ့မှောက် ဒူးထောက်ပြီး ‘ရဗ္ဗုနိ (ဆရာ)’လို့ ခေါ်လိုက်တဲ့ သူ့ဘဝရဲ့အံ့ဖွယ်အခိုက်အတန့်လေးကို ကျွန်တော် တိတ်တဆိတ် မျက်မြင်ကိုယ်တွေ့ တွေ့ခဲ့တယ်” ဟုဆိုသည်။

ယော ၂၀ တွင် မာဂဒလမာရိသည် ဗလာဖြစ်နေသော သခင်ယေရှု၏ သင်္ချိုင်းတော်အနီး၌ ငိုကြွေးနေသည်။ ထိုအရပ်၌ အဘယ်ကြောင့်ငိုကြွေးရ သနည်းဟု သူ့ကို လူတစ်ဦးက မေးသည်။ ဥယျာဉ်စောင့်ဟုထင်ပြီး ထမြောက် တော်မူသော ကယ်တင်ရှင်သခင်ယေရှုနှင့် သူမ စကားပြောခဲ့ရသည်။ သူမ၏ ဝမ်းနည်းခြင်းက ဝမ်းမြောက်ခြင်းသို့ ပြောင်းသွားပြီး “…သခင်ကိုတွေ့မြင်သည့်” အကြောင်း (:၁၈) တပည့်တော်များအား အပြေးသွားပြောတော့သည်။

သခင်ယေရှုသည် သေခြင်းမှရှင်ပြန်ထမြောက်တော်မူကြောင်း ကျွန်ုပ်တို့လည်း ယုံကြည်စိတ်ချမှုရှိပါသည်။ ယခု ကိုယ်တော်သည် ခမည်းတော်ဘုရား နှင့်အတူ ကောင်းကင်ဘုံ၌ရှိနေသော်လည်း ကျွန်ုပ်တို့ကို ကိုယ့်ဘာသာကိုယ် အသက်ရှင်ရန် မထားရစ်ခဲ့ပါ။ ခရစ်တော်ကိုယုံကြည်သူ ကျွန်ုပ်တို့အထဲ၌ သန့်ရှင်းသော ဝိညာဉ်တော်ရှိပါ၏။ ဝိညာဉ်တော်အားဖြင့် ကိုယ်တော်ကျွန်ုပ်တို့နှင့်အတူ ရှိကြောင်း၊ ကျွန်ုပ်တို့ကို “ကိုယ်တော်ပိုင်သတော်မူ”ကြောင်း သိရှိရခြင်းကြောင့် ကျွန်ုပ်တို့သည် စိတ်ချမှုရှိပြီး ဝမ်းမြောက်ရပါသည်။ ALYSON KIEDA