လူစီဝေါ့စလေသည် ဗြိတိသျှသမိုင်းပညာရှင်နှင့် တီဗွီအစီအစဥ်တင်ဆက်သူ ဖြစ်သည်။ နာမည်ကျော် ပုဂ္ဂိုလ်အများစုကဲ့သို့ပင် သူမသည်လည်း ရိုင်းစိုင်းသောစာများကိုရလေ့ရှိသည်။ သူမစကားပြောရာတွင် “r” အသံ များကို “w” အသံများ ဟု ထင်ရစေသည့် အနည်းငယ် လေလုံးမကွဲမှုနှင့် ပတ်သက်၍ ရရှိခြင်းဖြစ်သည်။ လူတစ်ဦးက “လူစီရေ၊ ကျနော်ဒဲ့တိုးပဲပြောမယ်။ ကျေးဇူးပြုပြီး ခင်ဗျားရဲ့လေးတွဲ့တွဲ့ စကားပြောပုံကို ပြင်ပါဗျာ။ ဒါမှမဟုတ် ခင်ဗျား ဖတ်ရမယ့် စာသားတွေထဲကနေ “r” စာလုံးတွေကို ထုတ်လိုက်။ ခင်ဗျားရဲ့ ရုပ်သံဇာတ်လမ်းတွဲကိုကြည့်ရင်း စိတ်ညစ် လွန်းလို့ ပြီးအောင်တောင် မကြည့်နိုင်ဘူး။ မေတ္တာဖြင့် – ဒါရန်”ဟု ရေးသားခဲ့သည်။

အချို့လူများအတွက်မူ ဤကဲ့သို့စာနာစိတ်ကင်းသော ဝေဖန်ချက်ကို တန်းတူ ရိုင်းစိုင်းသော တုံ့ပြန်ချက်မျိုးဖြင့် ပြန်ချေပရန် လှုံ့ဆော်ပေးနိုင်သည်။ သို့သော်လည်း လူစီက “အိုး … ဒါရန်၊ ရှင်က အင်တာနက်ပေါ်မှာ ကိုယ်ဘယ်သူမှန်း မသိနိုင်တာကို အခွင့်ကောင်းယူပြီး ကျွန်မကိုမျက်နှာချင်းဆိုင် မပြောလောက်မယ့် အရာတစ်ခုခုကို ပြောတယ်လို့ပဲ ထင်ပါတယ်။ ကျေးဇူးပြုပြီး ရှင့်ရဲ့မညှာမတာ အပြောကို ပြန်ဆင်ခြင်ပေးပါ။ – လူစီ” ဟုတုံ့ပြန်ခဲ့သည်။

လူစီ၏ ချင့်ချင့်ချိန်ချိန်တုံ့ပြန်ချက်က ထိရောက်သည်။ ဒါရန်သည် အနူးအညွှတ်တောင်းပန်ခဲ့ပြီး ထိုအီးမေးလ်မျိုးကို နောက်ထပ်မပို့ရန် ကတိပြုခဲ့သည်။

သုတ္တံကျမ်း၌ “ဖြည်းညင်းသောစကားသည် စိတ်ကိုဖြေတတ်၏။ ကြမ်းတမ်း သောစကားမူကား အမျက်ကိုနှိုးဆော်တတ်၏” (သု ၁၅:၁)၊ “မာနကြီးသောသူ သည် ရန်ကိုနှိုးဆော်တတ်၏။ သည်းခံနိုင်သောသူမူကား ငြိမ်းတတ်၏” (:၁၈)ဟု ဖော်ပြထားသည်။ မိမိ၏ လုပ်ဖော်ကိုင်ဖက်တစ်ဦးဦး၏ ဝေဖန်ချက်၊ မိသားစုဝင် တစ်ဦး၏မှိုချိုးမျှစ်ချိုးမှတ်ချက်၊ သူစိမ်းတစ်ဦးထံမှ မနှစ်မြို့ဖွယ်တုံ့ပြန်ချက် စသည်တို့ ခံရသောအခါတွင် မီးလောင်ရာလေပင့်မည့် အမျက်ဒေါသပါသော စကားများကို ပြောမည်လား။ သို့မဟုတ် ထိုမီးကိုငြိမ်းသတ်မည့် သိမ်မွေ့သော စကားတို့ကိုပြောမည်လား။ ကျွန်ုပ်တို့၌ ရွေးချယ်စရာရှိပါသည်။

ဒေါသစိတ်ကိုဖြေနိုင်မည့် စကားများပြောနိုင်ရန် ကျွန်ုပ်တို့ကို မစလျက် ဆက်ဆံရခက်သူတို့ ပြုပြင်ပြောင်းလဲနိုင်အောင် ဘုရားရှင်ကူမတော်မူပါ။ Sheridan Voysey