၁၈၃၀ ခုနှစ်က စကော့လူမျိုး သာသနာပြုဆရာ Alexander Duff (အလက်ဇန္ဒြားဒဖ်)သည် အိန္ဒိယပြည်သို့ ပထမဆုံး ရေကြောင်းခရီးဖြင့်သွားခဲ့ရာ၊ တောင်အာဖရိကကမ်းလွန် ရေပြင်၌ မုန်တိုင်းမိပြီး သ‌င်္ဘောပျက်စီးနှစ်မြှုပ်သွားသည်။ သူနှင့်တစ်လှေတည်းစီး ခရီးသွားသူချင်းတို့သည် လူမဲ့ကျွန်းငယ် တစ်ကျွန်းသို့ ရောက်ရှိသောင်တင်ပြီး မကြာမီမှာပင် ကမ်းခြေသို့မျှောပါ ရောက်လာသည့် ဒဖ်၏ကျမ်းစာအုပ်ကို ၎င်းတို့အဖွဲ့သားတစ်ဉီးက တွေ့ရှိခဲ့ သည်။ စာအုပ်ခြောက်သွားသောအခါ ဒဖ်က ဆာလံကျမ်း အခန်းကြီး ၁၀၇ ကို ဖတ်ပြပြီး သူတို့ခွန်အားယူကြသည်။ နောက်ဆုံးတွင် ၎င်းတို့ကယ်ဆယ်ခံရပြီး နောက်တစ်ကြိမ် သင်္ဘောပျက်ပြီးမှ ဒဖ်တို့ အိန္ဒိယသို့ ရောက်ရှိသွားသည်။

ဆာလံကျမ်း အခန်းကြီး ၁၀၇ တွင် ဣသရေလလူတို့အား ဘုရားသခင်ရွေးနုတ်ကယ်တင်ခြင်းအကြောင်းအချို့ကို ဖော်ပြထားသည်။ “လေပြင်းကို ပျောက်စေတော်မူ၍ လှိုင်းတံပိုးများသည် ငြိမ်ဝပ်ကြ၏။ ထိုသို့ငြိမ်ဝပ်သောကြောင့် သူတို့သည် ဝမ်းမြောက်ကြ၏။ အလိုရှိရာသင်္ဘောဆိပ်သို့ ပို့ဆောင်တော်မူ၏” (:၂၉-၃၀) ဟူသည် ကျမ်းပိုဒ်ကို ဒဖ်နှင့်သင်္ဘောအဖွဲ့သားများ ထပ်တူခံစားလျက် ခွန်အားယူခဲ့ကြမည် မလွဲပါ။ ထို့ပြင် ဣသရေလလူတို့ကဲ့သို့ပင် “လူသားတို့၌ ပြုတော်မူသော ကရုဏာနှင့် အံ့ဖွယ်သောအမှုတော်တို့ကို ထောက်၍၊ ထာဝရ ဘုရား၏ဂုဏ်ကျေးဇူးတော်ကို (သူတို့) ချီးမွမ်းကြ”ပေလိမ့်မည် (:၃၁)။

ဓမ္မသစ်ကျမ်းတွင် ဆာလံကျမ်း ၁၀၇:၂၈-၃၀ နှင့် ကျမ်းပြိုင်ကျမ်းချက်ကို ရှင်မဿဲခရစ်ဝင် ၈:၂၃-၂၇ နှင့် ရှင်မာကုခရစ်ဝင် ၄:၃၅-၄၁ တွင် တွေ့ရပါသည်။ သခင်ယေရှုနှင့် တပည့်တော်များ ပင်လယ်အလယ်၌ ရောက်ရှိနေကြစဉ် လေပြင်းမုန်တိုင်းကျခဲ့သည်။ တပည့်တော်များက ကြောက်ရွံ့လျက်အော်ဟစ် ကြစဉ် လူဇာတိခံသော ဘုရားသခင်ယေရှုသည် ပင်လယ်ကို ငြိမ်သက်စေခဲ့သည်။ ကျွန်ုပ်တို့လည်း အားယူရဲရင့်နိုင်ပါသည်။ တန်ခိုးကြီးမားသည့် ကျွန်ုပ်တို့၏ ကယ်တင်ရှင်သည် ကျွန်ုပ်တို့၏အော်ဟစ်သံကိုကြားပြီး ဘဝမုန်တိုင်းများ အလယ်တွင် ကျွန်ုပ်တို့ကို နှစ်သိမ့်သက်သာစေပါသည်။