၁၉ ရာစုအဦးပိုင်းတွင် Thomas Carlyle (သောမတ်စ်ခါးလိုင်)သည် သူ့ဝတ္ထုကိုသုံးသပ်ပေးရန် အတွေးအခေါ်ပညာရှင် John Stuart Mill (ဂျွန်စတီးဝထ်မေးလ်) ထံသို့ လက်ရေးမူစာမူတစ်ခုပေးပို့ခဲ့သည်။ မတော်တဆလား၊ တမင်တကာလားမသိ၊ ထိုစာမူမှာ မီးဖိုထဲကျသွားပြီး ဖျက်ဆီးခြင်းခံခဲ့ရသည်။ ထိုစာမူသည် Carlyle ၏ တစ်ခုတည်းသော လက်ရေးမူဖြစ်သည်။ စိတ်ဓာတ်ကျမသွားဘဲ သူသည် ပျောက်ပျက်သွားသောအခန်းကို ပြန်ရေးခဲ့သည်။ ဘာမဟုတ်သောမီးစသည် သူ့အသိဉာဏ်၌ စွဲကပ်တည်နေသောဝတ္တုကို မဟန့်တားနိုင်ခဲ့ပါ။ Carlyle သည် ကြီးမားသောဆုံးရှုံးမှုမှ အလွန်လှပကောင်းမွန်သော The French Revolution (ပြင်သစ်တော်လှန်ရေး) စာအုပ်ကို ထုတ်ဝေနိုင်ခဲ့သည်။

အကျင့်စာရိတ္တပျက်ပြားသော ယုဒမင်းဆက်အုပ်စိုးသည့် စိတ်ပျက်စရာခေတ်တွင် ဘုရားသခင်က ပရောဖက်ယေရမိအား “သင်သည် စာလိပ်ကိုယူပြီးလျှင် … သင့်အား ငါပြောသော…စကားအတိုင်း ရေးထားလော့” (ယေ ၃၆:၂) ဟု မိန့်တော်မူသည်။ ထိုသတင်းစကားသည် ရောက်လတံ့သောဘေးဥပါဒ်များမှ ကွယ်ကာလိုသောကြောင့် သူ့လူမျိုးတော်တို့ နောင်တရရန်အတွက် နိုးဆော်သော ဘုရားသခင်၏ နူးညံ့သောစိတ်သဘောတော်ကို ဖော်ပြနေသည် (:၃)။

ယေရမိသည် ဘုရားပြောသည့်အတိုင်း လုပ်ဆောင်ခဲ့သည်။ များမကြာမီ ယုဒဘုရင်ယောယကိမ်ထံသို့ ထိုစာလိပ်ရောက်ရှိသွားပြီး သူက တမင်စုတ်ဖြဲပြီး မီးထဲသို့ပစ်ချခဲ့သည်(:၂၃-၂၅)။ ဘုရင်၏လုပ်ရပ်က အမှုကိစ္စကို ပိုဆိုးသွားစေပါသည်။ ဘုရားရှင်သည် ယေရမိအား တူညီသောသတင်းစကား ရေးထားသည့် နောက်ထပ်စာလိပ်တစ်‌စောင်ကို ရေးရန်ပြောသည်။ “ထာဝရဘုရားသည် ယုဒရှင်ဘုရင် ယောယကိမ်ကိုရည်မှတ်၍ မိန့်တော်မူသည်ကား သူ၏အမျိုးအနွယ်သည်ဒါဝိဒ်၏ ရာဇပလ္လင်ပေါ်မှာ မထိုင်ရ။ သူ၏အသေကောင်ကို နေ့အချိန်၌ နေပူထဲသို့လည်းကောင်း၊ညဥ့်အချိန်၌နှင်းခဲထဲသို့လည်းကောင်းပစ်လိုက်ကြလိမ့်မည်”(:၃၀)။

ဘုရားစကားတော်ကို မီးရှို့ပစ်ရန်မှာ ဖြစ်နိုင်သော်လည်း ၎င်းသည် သဲထဲရေသွန် အရာမထင်သောအမှုပင် ဖြစ်သည်။ ထိုစာနောက်ကွယ်ရှိ‌ နှုတ်ကပတ်တော်သည် ထာဝရကာလပတ်လုံး တည်မြဲနေမည်ဖြစ်သည်။