Eli Wiesel (အီလိုင်းဝစ်ဆယ်) ရေးသားသည့် ‘Night’ (ည) ဆိုသည့်ဝတ္ထုက အစုလိုက်အပြုံလိုက် လူသတ်မှု၏ အနိဌာရုံကို ကွက်ကွက်ကွင်းကွင်း တွေ့ကြုံခံစားရစေသည်။ နာဇီသေမင်းတမန်စခန်း၌ သူကိုယ်တိုင်ကြုံခဲ့ရသည့် အတွေ့အကြုံပေါ် အခြေပြုသော ဝစ်ဆယ်၏အဖြစ်က သမ္မာကျမ်းစာပါ ထွက်မြောက်ရာကျမ်းအကြောင်းအရာနှင့် ပြောင်းပြန်ဖြစ်သည်။ ပထမဦးဆုံးသော ပသခါပွဲ၌ မောရှေနှင့် ဣသရေလလူမျိုးများ ကျွန်ခံရာမှ လွတ်မြောက်လာသော်လည်း (ထွ ၁၂)၊ နာဇီတို့သည် ပသခါပွဲအပြီးတွင် ဂျူးခေါင်းဆောင်များကို လိုက်လံဖမ်းဆီးကြောင်း ဝစ်ဆယ်က ပြောပြသည်။

ဝစ်ဆယ်နှင့် သူ၏အဆိုးမြင်ထေ့လုံးငေါ့လုံးကို ကျွန်ုပ်တို့ ဝေဖန်မိသော်လည်း အလားတူ လှည့်ကွက်မျိုး ကျမ်းစာထဲပါရှိကြောင်း စဉ်းစားမိသည်။ ပသခါပွဲညတွင် ရှင်ယေရှသည် ဘုရား၏လူများကို ဒုက္ခဆင်းရဲမှလွတ်မြောက်စေမည်ဟု မျှော်လင့်သော်လည်း ၄င်းအစား သူ့ကိုသတ်မည့်လူများလက်သို့ သူ့ကိုယ်သူ အပ်ခဲ့သည်။

ရှင်ယေရှုအဖမ်းမခံရမီမြင်ကွင်းကို ရှင်ယောဟန်က ဖွင့်ဟပြခဲ့သည်။ သူသစ္စာဖောက်ခံရတော့မည်ဖြစ်၍ “စိတ်နှလုံးတော်ပူပန်ခြင်း”ရှိလျက် (ယော ၁၃:၂၁) ရှင်ယေရှုသည် နောက်ဆုံးညစာစားပွဲ၌ သူသစ္စာဖောက်ခံရတော့မည်ဖြစ်ကြောင်း ကြိုတင်ပြောခဲ့သည်။ ထို့နောက် သူ့အား သစ္စာဖောက်မည့်သူကို မုန့်ခွံ့ကျွေးခဲ့သည့်လုပ်ရပ်ကို ကျွန်ုပ်တို့နားမလည်နိုင်။ “ယုဒရှကာရုတ်သည် မုန့်တစ်လုပ်စာကိုခံပြီးမှ ချက်ချင်းထွက်သွား၏။ ထိုအချိန်ကား ညအချိန်ဖြစ်၏”ဟု ကျမ်းစာ၌ဖတ်ရှုရသည် (:၃၀)။ သမိုင်း၏အကြီးမားဆုံးသော မတရားမှုကြီး ဖြစ်ပျက်လာတော့မည် ဖြစ်သော်လည်း ရှင်ယေရှုက “ယခုတွင်လူသားသည် ဘုန်းထင်ရှားခြင်းရှိသည်ဖြစ်၍ ဘုရားသခင်သည်လည်း လူသားအားဖြင့် ဘုန်းတော်ထင်ရှားခြင်းရှိ၏” (:၃၁)ဟု ကြွေးကြော်ခဲ့သည်။ နာရီအနည်းငယ်အတွင်း တပည့်တော်များသည် ကြောက်စိတ်မွှန်ခြင်း၊ ရှုံးနိမ့်ခြင်း၊ စိတ်ပျက်အားလျော့ခြင်းတို့ကို ကြုံတွေ့ခံစားရတော့မည်။ သို့သော် ဘုရား၏အကြံအစည်အတိုင်း ဖြစ်လာတော့မည်ဟု ရှင်ယေရှုမြင်သည်။

အမှောင်လောကက အောင်နိုင်ပုံပေါ်သော်လည်း၊ ဘုရားရှင်သည် သူ၏ညအမှောင်ကို ရင်ဆိုင်အောင်မြင်ခဲ့ကြောင်း အမှတ်ရနိုင်ပါသည်။ ကျွန်ုပ်တို့နှင့်အတူ ကိုယ်တော်လျှောက်လှမ်းနေ၍ အစဉ်အမြဲ ညဖြစ်နေမည်မဟုတ်ပါ။