မျိုးဆက်ပေါင်းစုံ ဝတ်ပြုကိုးကွယ်ခြင်းအစီအစဥ်၌ ချီးမွမ်းသီချင်းများ အတူတကွသီကျူးစဉ် လူများစွာ ဝမ်းမြောက်ခြင်းနှင့် ငြိမ်သက်ခြင်းကို ခံစားကြရသည်။ သို့သော် ခြေကုန်လက်ပန်းကျနေသော မိခင်တစ်ဦးတော့ မပါပါ။ ငိုလုဆဲဆဲ ကလေးငယ်ကို ပွေ့ချီကာချော့နေရင်း ငါးနှစ်ကလေးလေးကို သီချင်းစာအုပ်ဖွင့်ပြကာ လမ်းလျှောက်တက်စအရွယ်ကလေးကို ထွက်မပြေးသွားအောင် ဟန့်တားနေသည်။ ထို့နောက် သူ့အနောက်၌ထိုင်နေသည့် အသက်ကြီးကြီးအမျိုးသားတစ်ဦးက လမ်းလျှောက်တက်စအရွယ်ကလေးကို ဘုရားကျောင်းပတ်ပြီး လမ်းလျှောက်ပေးဖို့ ကမ်းလှမ်းပြီး၊ မိန်းမငယ်လေးတစ်ဦးကမူ ကလေးအကြီးဆုံးအတွက် သီချင်းစာအုပ် ကိုင်ပေးသည်။ ၂ မိနစ်အတွင်း ထိုမိခင်၏ခံစားချက် ပြောင်းသွားပြီး အသက်ရှူထုတ်လိုက်ကာ မျက်ဝန်းအစုံကိုပိတ်၍ ဘုရားသခင်ကို ဝတ်ပြုကိုးကွယ်လိုက်သည်။

အမျိုးသား၊ အမျိုးသမီး၊ အသက်ကြီးကြီးငယ်ငယ်၊ ယခင်ကတည်းက ဘုရားကိုယုံကြည်သူနှင့် ယုံကြည်သူအသစ်စသည်ဖြင့် သူ့လူများအားလုံး သူ့ကို ဝတ်ပြုကိုးကွယ်ရန် ဘုရားသခင်က အစဥ်အလိုရှိသည်။ ကတိထားရာပြည်သို့ မဝင်စားမီ ဣသရေလအနွယ် (၁၂) နွယ်တို့ကို မောရှေကောင်းချီးပေးရာ၌ “ယောက်ျား၊ မိန်းမ၊ သူငယ်များ၊ တည်းခိုသောတစ်ပါးအမျိုးသားများတို့”အားလုံး စုဝေးတွေ့ဆုံရန် ဆော်သြသည်။ သို့မှသာ သူတို့သည် “ကြား၍နားလည်သဖြင့် (သူတို့၏)ဘုရားသခင်ထာဝရဘုရားကို ကြောက်ရွံ့၍ ဤပညတ်တရားစကား အလုံးစုံတို့ကို စောင့်ရှောက်”မည်အကြောင်းတည်း (တရား ၃၁:၁၂)။ ဘဝ၏မည်သည့်အရွယ်၌ ပင်ရှိရှိ ဘုရားရှင်၏လူများ သူ့အား အတူတကွ ဝတ်ပြုကိုးကွယ်နိုင်အောင် ကျွန်ုပ်တို့ လုပ်ဆောင်ပေးခြင်းသည် ဘုရားရှင်အား ဂုဏ်ပြုချီးမြှောက်ခြင်းဖြစ်သည်။

ထိုနေ့မနက် ဘုရားကျောင်း၌ ကလေးမိခင်၊ အသက်ကြီးကြီးအမျိုးသားနှင့်၊ မိန်းမပျိုလေးတို့သည် ပေးကမ်းခြင်း၊ ရယူခြင်းတို့ဖြင့် ဘုရားရှင်၏ချစ်မေတ္တာကို ခံစားခဲ့ကြရသည်။ နောက်တစ်ကြိမ် သင် ဘုရားကျောင်းသို့ရောက်လျှင် တစ်ပါးသူကို အကူအညီပေးခြင်း (သို့) တစ်ပါးသူ၏ကျေးဇူးပြုခြင်းကို လက်ခံခြင်းအားဖြင့် သင်လည်း ဘုရားရှင်၏မေတ္တာကို တိုးချဲ့နိုင်ပါသည်။