အမေရိကန်နိုင်ငံ၊ ကော်လိုရာဒိုပြည်နယ်ရှိ မိခင်တစ်ဦးသည် သူမ၏ကလေးငယ်ကို ကာကွယ်ရန် မည်သည့်အရာကိုမဆို လုပ်နိုင်ကြောင်း သက်သေပြခဲ့သည်။ သူမ၏ (၅)နှစ်အရွယ် သားလေးသည် အိမ်အပြင်၌ကစားနေစဉ် ကလေးငယ်၏ ကျယ်လောင်စွာအော်ဟစ်သံကို သူမ ကြားလိုက်ရ၍ အိမ်အပြင်သို့ အလျင်အမြန် ထွက်ကြည့်ရာ၊ သားလေး၏ မထင်မှတ်ထားသည့် “ကစားဖော်”မှာ ခြင်္သေ့တစ်ကောင် ဖြစ်နေသဖြင့် သူမ အလွန်ထိတ်လန့်သွားသည်။ ခြင်္သေ့ကြီးသည် ကလေးအပေါ်သို့ ရောက်နေပြီး ကလေး၏ခေါင်းမှာ ခြင်္သေ့၏ပါးစပ်အတွင်းသို့ ရောက်နေသည်။ ထိုအခါ မိခင်ဖြစ်သူသည် ဝံမကြီးကဲ့သို့ သူ့အတွင်းမှ ရှိသမျှအားအင်ကို စုစည်းကာ ခြင်္သေ့၏ပါးစပ်ကို ခက်ခက်ခဲခဲ ဆွဲဖြဲကာ သားကိုကယ်ရန် ကြိုးစားသည်။ ထိုမိခင်၏ သူရဲကောင်းဆန်သောလုပ်ရပ်သည် နှုတ်ကပတ်တော်၌ ဖော်ပြပါရှိသည့် ဘုရား သခင်သည် မိခင်တစ်ဦးကဲ့သို့ပင် သူ၏သားသမီးများပေါ် ခိုင်မြဲသော ချစ်ခြင်းမေတ္တာရှိပြီး ကာကွယ်ပေးနေကြောင်း ကျွန်ုပ်တို့အား သတိပေးအမှတ်ရစေသည်။
မိခင်လင်းယုန်က သားပေါက်ကလေးများကို ဂရုစိုက်သကဲ့သို့ ဘုရားရှင်သည် သူ၏သားသမီးများကို ကြင်နာစွာ ဂရုပြုစောင်မကာ နှစ်သိမ့်သည် (တရား ၃၂:၁၀-၁၁၊ ဟေရှာ ၆၆:၁၃)။ မိခင်တစ်ဦးက သူမ ပြုစုစောင့်ရှောက်ခဲ့သော ကလေးငယ်ကို ဖြတ်တောက်၍မရသော နှောင်ကြိုးများဖြင့် ချည်နှောင်လျက် ဘယ်သောအခါမှ မမေ့နိုင်သကဲ့သို့၊ ထာဝရဘုရားသည်လည်း သူ့သားသမီးများကို ဘယ်သောအခါမှ မမေ့၊ ကရုဏာတရားကို ထာဝရ ချုပ်တည်းထားခြင်း မရှိပါ (ဟေရှာ ၅၄:၇-၈)။ မိခင်ငှက်မကြီးက ငှက်ပေါက်လေးများကို အတောင်ပံအောက်၌ လွှမ်းခြုံကာကွယ်ပေးသကဲ့သို့ ဘုရားသခင်သည်လည်း သူ၏သားသမီးများကို “အတောင်တော်အမွေးနှင့်ဖုံးအုပ်တော်မူ၍၊ အတောင်တော်အောက်၌ (သူတို့ကို)လုံခြုံစွာနေ(စေ သည်)။ သစ္စာတော်သည် (သူတို့)၏ဒိုင်းလွှား” ဖြစ်စေလိမ့်မည် (ဆာ ၉၁:၄)။
တစ်ခါတစ်ရံတွင် အထီးကျန်ခြင်းနှင့် မေ့လျော့ခံရခြင်းကို ကျွန်ုပ်တို့ ခံစားရပြီး ဝိညာဉ်ရေးရာ သားရဲတို့၏ထောင်ချောက်တွင် ပိတ်မိနေတတ်သည်။ ကိုယ်တော်သည် ကျွန်ုပ်တို့ကို ကြင်နာစွာ ဂရုစိုက်လျက်၊ နှစ်သိမ့်မှုပေးပြီး တိုက်ပွဲဝင်ပေးနေကြောင်း အမြဲသတိရနေစေရန် ကိုယ်တော် မစတော်မူပါ။
သင့်အသက်တာတွင် ဘုရားသခင်၏ပုံသဏ္ဌာန်တော်ကို
မိဘအဖြစ် သင်မည်ကဲ့သို့ ပုံဖော်မြင်ဖူးသနည်း။
ဘုရားသခင်၏ ဂရုစိုက်ခြင်း၊ နှစ်သိမ့်ပေးခြင်း၊
ကာကွယ်ပေးခြင်းတို့ကို မည်သည့်နည်းလမ်းများဖြင့်
သင်ကြုံတွေ့ခံစားဖူးပါသနည်း။
ကောင်းကင်ဘုံရှင် အဘ၊ ငှက်ငယ်ကလေးများက သူတို့မိခင်၏အတောင်အောက်၌ အကာအကွယ်ကို ရရှိသကဲ့သို့ ကျွန်ုပ်တို့ကိုလည်း ကိုယ်တော်၏သစ္စာတော် ဒိုင်းလွှားအောက်၌ ခိုလှုံခွင့်ပေးတော်မူပါ။
ဆာလံကျမ်း ၉၁ သည် ထာဝရဘုရားသခင် (ယာဝေ) အရှင်ကို မိမိ၏ဘုရားအဖြစ်ရွေးချယ်သူ၊ ထိုဘုရားကို ယုံကြည်ပြီး ချစ်သောသူများ၌ရှိသည့် လုံခြုံမှုနှင့် တည်ငြိမ်မှုကို ဖော်ကျူးဂုဏ်ပြုထားသည်
(:၂၊ ၁၄)။ ဆာလံဆရာက လျှို့ဝှက်အကြံအစည်များနှင့် သေစေနိုင်သောအနာများမှအစ
(:၃)၊ မမျှော်လင့်သော အဖြစ်အပျက်များ၊ ရုပ်ပိုင်းဆိုင်ရာ တိုက်ခိုက်မှုများနှင့် ပျက်စီးဆုံးရှုံးမှုများအထိ
(:၅-၆) အသက်တာရှိ များမြောင်လှစွာသော လောကဓံအန္တရာယ်များကို ဖော်ပြထားသည်။ ဤဆာလံသည် ထိုကဲ့သို့သော အန္တရာယ်များမှ ကာကွယ်ပေးမည်ဟု ကတိမပေးထားသော်လည်း ၎င်းတို့ကို ရင်ဆိုင်ရသောအခါ လုံခြုံမှုနှင့် တည်ငြိမ်မှုကို ပေးမည်ဟု ကတိပေးထားသည်။ ထာဝရဘုရား၌ ခိုလှုံသောသူတို့သည် ကြောက်စရာမလိုပေ။ အဘယ့်ကြောင့်ဆိုသော် ဘုရားသခင်သည် သူတို့၏ အကွယ်အကာ၊ ကယ်တင်ရွေးနုတ်သူ၊ ခွန်အားအစွမ်းသတ္တိနှင့် လုံခြုံရာဖြစ်သည်။ ဘုရားသခင် ပေးစွမ်းသောလုံခြုံမှုကို အမျိုးမျိုးသော အလင်္ကာများစွာဖြင့် အသုံးပြုဖော်ပြထားပါသည်။ “အမြင့်ဆုံးသောဘုရား၏ ကွယ်ကာရာဌာန” နှင့် “အနန္တတန်ခိုးရှင်၏ အရိပ်”
(:၁)၊ “ခိုလှုံရာ” နှင့် “ရဲတိုက်”
(:၂)၊ “အတောင်တော်အမွေး” နှင့် “ဒိုင်းလွှား”
(:၄)၊ “ခိုလှုံရာ”
(:၉) စသည်တို့ဖြစ်သည်။
အခန်းငယ် ၁၁-၁၂ ကို ကျမ်းစကားစပ်အတိုင်း မဟုတ်ဘဲ ကောက်နှုတ်ဆင်ခြင်ရန်မှာ စာတန်သည် ဘုရားသခင်၏ကတိတော်ကို စမ်းသပ်သည့်အနေဖြင့် သခင်ယေရှုကို ဗိမာန်တော်ထိပ်မှ အောက်သို့ခုန်ချရန် စုံစမ်းသွေးဆောင်ခဲ့သည်
(ရှင်မဿဲခရစ်ဝင် ၄:၆)။ သခင်ယေရှုက
တရားဟောရာကျမ်း ၆:၁၆ ကို ကိုးကားပြီး ခြေမထိခိုက်အောင် ကာကွယ်မှုဖြင့် ဘုရားသခင်၏ဂရုပြုမှုကို သက်သေပြရန် တောင်းဆိုခြင်းသည် မှားယွင်းကြောင်း သတိပေးခဲ့သည်
(ရှင်မဿဲခရစ်ဝင် ၄:၇)။
K. T. Sim
