ကျောင်းစားသောက်ဆိုင်များသည် အစားအသောက် ဝန်ဆောင်မှုလုပ်ငန်းများကဲ့သို့ စားစရာများ မည်မျှလိုအပ်မည်ကို မခန့်မှန်းနိုင်သဖြင့် အစားအသောက်ကို လိုအပ်သည်ထက် ပိုပြင်ဆင်ထားလေ့ရှိသဖြင့် အစားအသောက်အကျန်များသည် အလကားဖြစ်ရသည်။ တစ်ချိန်တည်းမှာပင် အိမ်၌စားစရာလောက်ငစွာ မရှိသဖြင့် ပိတ်ရက်များတွင် ဆာလောင်နေသည့် ကျောင်းသားများရှိနေသည်။ အမေရိကန်နိုင်ငံရှိ ခရိုင်တစ်ခုမှ ကျောင်းတစ်ကျောင်းသည် ဒေသတွင်းရှိ လူမှုရေးအဖွဲ့အစည်းတစ်ခုနှင့် လက်တွဲကာ ဤပြဿနာအတွက် အဖြေရှာခဲ့သည်။ ၎င်းတို့သည် အစားအသောက်အကျန်များကို ထုပ်ပိုးပြီး ကျောင်းသားများအား ပေးလိုက်ခြင်းဖြင့် အစားအသောက်များ အလဟဿဖြစ်ခြင်းနှင့် ငတ်မွတ်သည့်ပြဿနာကို တစ်ပြိုင်နက်တည်းတွင် ဖြေရှင်းလိုက်နိုင်သည်။
ငွေကြေးပိုလျှံနေခြင်းသည် စားစရာများ ပိုလျှံနေခြင်းကဲ့သို့ ပြဿနာတစ်ရပ်ဖြစ်သည်ဟု လူအများက မယူဆကြသော်လည်း၊ ထိုကျောင်း၏လုပ်ဆောင်မှု၏ နောက်ခံ အခြေခံသဘောတရားသည် တမန်တော်ရှင်ပေါလုက ကောရိန္သုအသင်းတော်ထံသို့ ပေးပို့သောစာတွင် ဖော်ပြသကဲ့သို့ပင် ဖြစ်သည်။ မာကေဒေါနိရှိ အသင်းတော်များသည် အခက်အခဲနှင့် ရင်ဆိုင်နေရကြောင်းကို ရှင်ပေါလုသိသဖြင့် ကောရိန္သုရှိအသင်းတော်အား ၎င်းတို့၏စည်းစိမ်ဖြင့် လိုအပ်နေသူများအား မစရန် ပြောကြားသည် (၂ ကော ၈:၁၄)။ သူ၏ရည်ရွယ်ချက်မှာ အသင်းတော်များကြားတွင် တန်းတူညီမျှမှုကို ဆောင်ကြဥ်းပေးပြီး အခြားသူများ ဒုက္ခရောက်နေချိန်တွင် မည်သူ့ထံတွင်မှ အလွန်ပိုလျှံနေခြင်းမျိုး မရှိစေရန် ဖြစ်သည်။
ရှင်ပေါလုက ကောရိန္သုရှိ ယုံကြည်သူများအား ၎င်းတို့ ပေးလိုက်ရခြင်းကြောင့် ဆင်းရဲသွားစေခြင်း မဟုတ်ဘဲ၊ အတူတကွ မျှဝေလျက် မာကေဒေါနိအသင်းတော်အပေါ် ရက်ရောစေခြင်းဖြင့် ရှေ့အနာဂတ်တစ်ချိန်ချိန်တွင် ၎င်းတို့လည်း ထိုသို့သော အကူအညီမျိုး လိုအပ်လာနိုင်ကြောင်းကို စာနာမိစေသည်။ ကျွန်ုပ်တို့ကိုယ်တိုင်လည်း လိုအပ်နေသူများနှင့် တွေ့သောအခါ မိမိ၌ ဝေမျှစရာ မည်သည့်အရာများရှိသည်ကို ပြန်လည်ဆင်ခြင်ကြပါစို့။ ကျွန်ုပ်တို့၏ဝေမျှခြင်းက နည်းသည်ဖြစ်စေ၊ များသည်ဖြစ်စေ ဘယ်သောအခါမှ အချည်းနှီးမဖြစ်ပေ။
ဘုရားသခင်သည် သင့်လိုအပ်ချက်များကို
အခြားလူပုဂ္ဂိုလ် (သို့) အဖွဲ့အစည်းအားဖြင့်
မည်ကဲ့သို့ ကူညီမစပေးသနည်း။ ထိုသို့သော ရက်ရောမှုကို
သင်လည်း မည်သို့ပြန်လည်ပေးကမ်းနိုင်မည်နည်း။
ကောင်းကင်ဘုံရှင် အဘဘုရား၊ ကိုယ်တော်ပေးထားသည့် ကောင်းချီးဥစ္စာများကို မျှဝေပေးနိုင်ရေး လိုအပ်သူများကိုသိမြင်ရန် ကျွန်ုပ်ကိုနှိုးဆော်ပါ။ ကျွန်ုပ်လိုအပ်နေသည့် အချိန်ခါမျိုးတွင်လည်း ကိုယ်တော်ကို ချစ်သောသူများမှတစ်ဆင့် ကျွန်ုပ်အား ပြန်လည်ဖြည့်ဆည်းပေးမည်ကိုလည်း ယုံကြည်ရန် မစတော်မူပါ။
ကောရိန္သုဩဝါဒစာ ဒုတိယစောင်၏ အဓိကဆိုလိုရင်းမှာ အားနည်းသောအခြေအနေနှင့် ရုန်းကန်မှုများမှတစ်ဆင့် ဘုရားသခင်၏ကျေးဇူးတော်နှင့် တန်ခိုးတော်ကို ဆန့်ကျင်ဘက်သဘောဆောင်သည့် နည်းလမ်းဖြင့် ဖော်ပြထားသည်။ သေခြင်းကိုဖြတ်သန်းရသည့် ဘဝခရီးလမ်းဖြင့်သာလျှင် သခင်ခရစ်တော်၏ ရှင်ပြန်ထမြောက်သည့် အသက်တာကို ကျွန်ုပ်တို့တွေ့ကြုံ ရင်ဆိုင်ရနိုင်သည်။ ရှင်ပေါလုသည်
ကောရိန္သုဩဝါဒစာ ဒုတိယစောင် ၄:၇-၁၀ တွင် အောက်ပါအတိုင်း ရှင်းပြထားသည်။ “သို့သော်လည်း တန်ခိုးတော်၏ ဂုဏ်အသရေသည် ငါတို့နှင့်မဆိုင်၊ ဘုရားသခင်နှင့်ဆိုင်မည်အကြောင်း၊ ထိုဘဏ္ဍာသည် မြေအိုးထဲမှာ ထည့်ထားလျှက် ငါတို့၌ရှိ၏။ ငါတို့သည် အမျိုးမျိုးသော နှောင့်ယှက်ခြင်းကိုခံရသော်လည်း၊ အကျိုးနည်းခြင်းသို့မရောက်။ မကြံစည်နိုင်အောင်ရှိသော်လည်း စိတ်မပျက်။ ညင်းဆဲခြင်းကိုခံရသော်လည်း ရှုံးခြင်းမရှိ။ အောက်သို့လှဲခြင်းကိုခံရသော်လည်း ဆုံးရာသို့မရောက်။ သခင်ယေရှုသည် အသက်ရှင်တော်မူကြောင်းကို ငါတို့ကိုယ်ခန္ဓာ၌ ထင်ရှားစေခြင်းငှါ ယေရှု၏ သေတော်မူခြင်းကို အစဉ်မပြတ်ငါတို့၏ ကိုယ်ခန္ဓာ၌ ဆောင်ရကြ၏။”
ကောရိန္သုဩဝါဒစာ ဒုတိယစောင် ၈ တွင် ဤဆန့်ကျင်ဘက် အခြေအနေ၌ ပုံသက်သေကောင်းဖြစ်ကြသည့် မာကေဒေါနိပြည်မှ ယုံကြည်သူများကို တွေ့ရှိရသည်။ အလွန်ပြင်းထန်သည့် ဒုက္ခဝေဒနာများခံစားရပြီး အလွန် ဆင်းရဲကြပ်တည်းမှုကို တွေ့ကြုံနေရစဥ်၌ပင် သူတို့သည်ဆက်လက်၍ အလွန်အံ့သြဖွယ် ကောင်းလောက်အောင်ပင် ရက်ရောစွာ ပေးကမ်းလှူဒါန်းနိုင်လောက်အောင် ရဲရင့်ခြင်း ရှိကြသည်
(:၂-၃)။ ဤနည်းအားဖြင့် ယုံကြည်သူများ “စည်းစိမ်ရှိစေခြင်းငှာ” သခင်ယေရှုဆင်းရဲခံခဲ့သည့် စံနမူနာကောင်းကို သူတို့လိုက်လျှောက် ကျင့်သုံးကြပေသည်
(:၉)။
မိုနီကာလာရို့စ်
