ဂျဲန်သည် သူမ၏ပထမခင်ပွန်း ဆုံးပါးသွားပြီးနောက် နောက်အိမ်ထောင်ပြုခဲ့သည်။ ခင်ပွန်းအသစ်၏သားသမီးများက သူမကို လုံးဝလက်မခံဘဲ ယခု သူဆုံးပါးသွားသောအခါ သူတို့၏ငယ်ဘဝအိမ်တွင် ရှိနေသည့်သူမကို မုန်းတီးကြသည်။ သူမ၏ ခင်ပွန်းသည် သူမအတွက် အတော်အသင့်သောငွေကို ချန်ထားခဲ့သည့်အတွက် သူ့ကလေးများက သူတို့အမွေကို ခိုးသည်ဟု ပြောကြသည်။ ဂျဲန်၏စိတ်ပျက်လာမှုက နားလည်နိုင်ဖွယ်ရာဖြစ်ပြီး သူမ၏နာကြည်းခါးသီးမှုများ ကြီးထွားလာသည်။
“နောမိ၏ခင်ပွန်းသည် မိသားစုလိုက် မောဘပြည်သို့ ပြောင်းရွှေ့ခဲ့ပြီး၊ ထိုပြည်၌ သူနှင့် သူတို့၏သားနှစ်ဦး သေဆုံးသွားကြသည်။ နှစ်များစွာကြာပြီးနောက် နောမိသည် သူ၏ချွေးမရုသမှလွဲပြီး လက်ဗလာဖြင့် ဗက်လင်မြို့သို့ပြန်ခဲ့သည်။ တစ်မြို့လုံး အုတ်အုတ်ကျက်ကျက်ဖြစ်သွားပြီး “ဤသူကား နောမိဟုတ်သလော” ဟု မေးကြသည် (ရု ၁:၁၉)။ “နှစ်လိုဖွယ်ကောင်းသောသူ” ဟု အဓိပ္ပာယ်ရှိသည့် ထိုအမည်ကို မခေါ်သင့်။ “ခါးသောအရာ” ဟုအဓိပ္ပာယ်ရှိသော “မာရ” ဟုခေါ်ပါ။ အဘယ်ကြောင့်ဆိုသော် “ငါသည် ကြွယ်ဝပြည့်စုံလျက် ထွက်သွား၏။ ယခုမူကား ဆင်းရဲလျက် တစ်ကိုယ်တည်းရှိမှ ထာဝရဘုရားသည် ငါ့ကို ပို့ပြန်တော်မူပြီ” (:၂၀-၂၁) ဟု ရုသပြန်ပြောလေသည်။
သင့်နာမည်ရော ခါးသောအရာဟု အဓိပ္ပာယ်ဖြစ်နေပါသလား။ သူငယ်ချင်း၊ မိသားစု၊ သို့မဟုတ် ယိုယွင်းနေသော ကျန်းမာရေးကြောင့် သင် စိတ်ပျက်နေရပါသလား။ သင်က ပိုကောင်းသောအရာနှင့် ထိုက်တန်ပါသည်။ သို့သော် ထိုအရာကို မရခြင်းကြောင့် ယခု သင်နာကျင်ခါးသီးနေပါသည်။
နောမိသည် ဗက်လင်မြို့သို့ ခါးသီးမှုဖြင့်ပြန်လာရသော်လည်း အိမ်ပြန်ခဲ့ပါသည်။ သင်လည်း အိမ်ပြန်လာနိုင်ပါသည်။ ရုသ၏သားမြေးဖြစ်သည့် ဗက်လင်မြို့တွင် မွေးဖွားသော ရှင်ယေရှုထံသို့ပြန်လာပါ။ သူ၏ချစ်ခြင်းမေတ္တာ၌ ခိုလှုံဆည်းကပ်ပါ။
အချိန်တန်သော် ဘုရားသခင်သည် စုံလင်သောသူ၏အကြံအစည်တော် ပြည့်စေပြီး (၄:၁၃-၂၂)၊ ဝမ်းမြောက်ခြင်းဖြင့် နောမိ၏ခါးသီးမှုကို အစားထိုး ပေးခဲ့သည်။ သင်၏ခါးသီးမှုကိုလည်း ဘုရားသခင် အစားထိုးပေးနိုင်ပါသည်။ အိမ်ကို ပြန်ခဲ့ပါ။
