ကျွန်မ၏သူငယ်ချင်း Ira (အီရာ)သည် ၂ဝ၂၂ ခုနှစ်တွင် ရန်သူဝိုင်းထားခြင်းခံရသည့် ယူကရိန်းနိုင်ငံ၏မြို့တော် Kyiv (ကိဗ်)၌ရှိသော သူမ၏အိမ်မှ ထွက်ခွာခဲ့ပြီး ရက်ပိုင်းအတွင်းတွင် အပြေးပြိုင်ပွဲတစ်ခုပြီးဆုံးပြီးနောက် သူမ၏နိုင်ငံတော်အလံကို ကိုင်မြှောက်ထားသည့် ယခင်က ဓာတ်ပုံတစ်ပုံကို အင်တာနက်၌ တင်ခဲ့ပြီး “ကျွန်မတို့ဟာ ဘဝဆိုတဲ့ မာရသွန်ပြေးပွဲကို ကိုယ့်အစွမ်းအစရှိသမျှ အကောင်းဆုံးအားထုတ်ပြီး ပြေးနေကြတဲ့သူတွေဖြစ်တယ်။ ခုအချိန်မှာ ပိုပြီးကောင်းအောင် အားစိုက်ထုတ်ပြီး ပြေးကြရမှာဖြစ်တယ်။ ကျွန်မတို့နှလုံးသားထဲမှာ ဘယ်တော့မှ မသေဆုံးသွားမဲ့ တစ်စုံတစ်ရာအားဖြင့်ပေါ့” ဟု ရေးသားခဲ့သည်။ ၎င်းကို ဖတ်မိပြီးနောက် ကျွန်မ မျက်ရည်မကျဘဲ မနေနိုင်တော့ပါ။ သူမသည် သူမ၏တိုင်းပြည်ရှိ ဒုက္ခဝေဒနာခံစားနေကြရသူများအတွက် မည်သို့ဆုတောင်းပေးရန်၊ မည်သို့ပံ့ပိုးကူညီနိုင်သည်ကို ကျွန်မတို့အား ဆက်လက် အသိပေးဝေမျှခြင်းအားဖြင့် ကျွန်မ၏သူငယ်ချင်းသည် ထိုပြေးပွဲကို နည်းလမ်းမျိုးစုံဖြင့် ဆက်လက်ပြေးနေကြောင်း ကျွန်မတွေ့ရှိခဲ့ရသည်။

အီရာ၏စကားလုံးများက ဟေဗြဲသြဝါဒစာ ၁၂ မှ “အားမလျော့ဘဲပြေး”ရန် ယုံကြည်သူတို့အား တိုက်တွန်းထားချက်ကို ပိုမိုလေးနက်စေပါသည် (:၁)။ အခန်းကြီး ၁၁ ၌ပါရှိသော မိမိတို့၏အသက်အန္တရာယ်ကိုပင် မမှုဘဲ ရဲရင့်လျက် (၁၁:၃၃-၃၈) မြဲမြံတည်ကြည်သော ယုံကြည်ခြင်းဖြင့် အသက်ရှင်ခဲ့ကြသည့် “များစွာသော သက်သေအပေါင်းတို့” ဖြစ်သည့် (၁၂:၁) စိတ်လှုပ်ရှားဖွယ်ယုံကြည်ခြင်းသူရဲကောင်းတို့၏အကြောင်း ဖော်ပြချက်နောက်တွင် ထိုတိုက်တွန်းချက်က လိုက်ပါလာသည်။ ထိုသူတို့သည် “(ဘုရားသခင်၏ကတိတော်များကို) အဝေးကမျှော်မြင်လျက်၊ စိတ် နှလုံးနှင့်ဖက်ယမ်း” ခဲ့ကြသော်လည်း (၁၁:၁၃) သူတို့သည် ထာဝရတည်သော ဘယ်တော့မှ မသေဆုံးသည့် တစ်စုံတစ်ရာအတွက် အသက်ရှင်ခဲ့ကြသည်။

သခင်ယေရှု၌ယုံကြည်သူအားလုံးသည် ထိုကဲ့သို့အသက်ရှင်ရန် ခေါ်တော်မူခြင်းခံရသည်။ အကြောင်းမှာ ဘုရားသခင့်နိုင်ငံတော်၏ ကြီးပွားတိုးတက်ခြင်းနှင့် ‘shalom’ (ငြိမ်သက်ခြင်း) အတွက် ကျွန်မတို့အားလုံး၌ ရှိသမျှကို ပေးအပ်ရန် ထိုက်တန်ပါသည်။ ကျွန်မတို့အား ထိန်းသိမ်းတည်စေသည့်အရာမှာ ခရစ်တော်၏ ပုံသက်သေနှင့်တန်ခိုးပင် ဖြစ်သည် (၁၂:၂-၃)။