အမေရိကန်သမ္မတ Abraham Lincoln (အာဗြံဟံလင်ကွန်း)၏သား Robert Todd Lincoln (ရောဘတ်တော့လင်ကွန်း)သည် သူ့ဖခင်အပြင် သမ္မတ James Garfield (ဂျိမ်းစ်ဂါဖီး)နှင့် William McKinley (ဝီလျံမက်ကင်းလေး)တို့ လုပ်ကြံခံရသည့် အရေးကြီးအဖြစ်အပျက် (၃)ခု ဖြစ်ပျက်ချိန်၌ ရှိနေသူဖြစ်သည်။
သို့သော် သခင်ယေရှု၏ နောက်ဆုံးညစာစားပွဲ၊ ဂေသရှေမန်ဥယျာဥ်တွင် ခရစ်တော်၏မချိတင်ကဲဝေဒနာ၊ သခင်ကားတင်ခံရခြင်းနှင့် ရှင်ပြန်ထမြောက်ခြင်း စသည့် အရေးပါသော သမိုင်းအဖြစ်အပျက် ‘(၄) ခု’တွင် တမန်တော် ရှင်ယောဟန် ရှိနေခဲ့ကြောင်းကို ဆင်ခြင်ကြည့်ပါ။ ထိုသို့ ဖြစ်ပျက်သည့်အခိုက်အတန့်တွင် သူရှိနေရခြင်း၏ အကောင်းဆုံးသော ‘အကြောင်းရင်း’အတွက် သူသည် မျက်မြင် သက်သေဖြစ်ရခြင်းကို ရှင်ယောဟန်သိသည်။ ရှင်ယောဟန်ခရစ်ဝင် ၂၁:၂၄-၂၅ တွင် “ထို တပည့်တော်ကား ဤအကြောင်းအရာတို့ကို သက်သေခံ၍ ရေးထားသောသူ ဖြစ်၏။ သူ၏သက်သေခံချက်မှန်သည်ကို ငါတို့သိကြ၏” ဟု သူရေးခဲ့သည်။

ရှင်ယောဟန်သည် ရှင်ယောဟန်ဩဝါဒစာပထမစောင်တွင် ထိုအချက်ကိုထပ်မံအတည်ပြုခဲ့သည်။ “ရှေးဦးစွာကပင်ဖြစ်၍ ငါတို့သည် ကိုယ်တိုင်ကြားလျက်၊ ကိုယ်မျက်စိနှင့်မြင်လျက် စေ့စေ့ကြည့်ရှု၍ လက်နှင့်စမ်းသပ်ခဲ့ပြီးသောအရာတည်း ဟူသော အသက်ရှင်သောနှုတ်ကပတ်တော်နှင့် ဆိုင်သောအရာကို သင်တို့အား ပြသကြ၏” (၁:၁)ဟု ရေးသားခဲ့သည်။ ရှင်ယောဟန်သည် သခင်ယေရှုအကြောင်း သူ၏မျက်မြင်သက်သေမှတ်တမ်းကို မျှဝေရန် တာဝန်ရှိသည်ဟု လှုံ့ဆော်မှုကို ခံစားခဲ့ရသည်။ အဘယ့်ကြောင့်နည်း။ “သင်တို့သည် ငါတို့နှင့် မိတ်သဟာယဖွဲ့စေခြင်းငှာ ငါတို့ကြားမြင်ရသောအရာကို သင်တို့အား ပြသကြ၏” (:၃)။

ကျွန်ုပ်တို့အသက်တာ၏အဖြစ်အပျက်များသည် အံ့အားသင့်စရာ သို့မဟုတ် သာမန်မျှသာ ဖြစ်ကောင်းဖြစ်မည်။ သို့သော် မည်သို့ပင်ဖြစ်ဖြစ် ဘုရားသခင်သည် ထိုအရာများကို ပဲ့ကိုင်နေခြင်းကြောင့် ကျွန်ုပ်တို့သည် သူ့အတွက် သက်သေခံနိုင်မည်ဖြစ်သည်။ ကျွန်ုပ်တို့သည် ခရစ်တော်၏ကျေးဇူးတော်နှင့် ဉာဏ်ပညာ၌ အမှီပြုတည်နေခြင်းကြောင့် ဘဝ၏အံ့သြဖွယ်အခိုက်အတန့်များတွင်ပင် ခရစ်တော်အတွက် ကိုယ်စားပြုကြပါစို့။