၁၉၃၈ ခုနှစ်တွင် အစပြုသည်
အမေရိကန် ကျမ်းစာသင်ကြားပို့ချသူ ဒေါက်တာ အမ် အာရ် ဒီဟန်းသည် ရေဒီယိုမှ သမ္မာကျမ်းစာသင်ခန်းစာများကို စတင်သင်ကြားပို့ချခဲ့သည်။ ဒီထရိုက် သမ္မာကျမ်းစာသင်ခန်းစာဟု အစပြုခဲ့ပြီး နောက်ပိုင်းတွင် ရေဒီယိုသမ္မာကျမ်းစာသင်တန်း ဟု ပြောင်းလဲမှည့်ခေါ်ခဲ့သည်။ ထိုအချိန်အတောအတွင်းမှာပင် ဒေါက်တာ အမ် အာရ် ဒီဟန်းသည် Our Daily Bread ဝတ်ပြုကိုးကွယ်ခြင်းစာအုပ်ကိုလည်း စတင်တည်းဖြတ် လုပ်ဆောင်ခဲ့သည်။
ဘုရားသခင်၏ကျေးဇူးတော်ကြောင့် ကျွန်ုပ်တို့၏အမှုတော်လုပ်ငန်းသည် ထိုစဥ်ကတည်းကပင် ကျယ်ပြန့်ကြီးထွားလာခဲ့ပါသည်။ သို့နှင့် RBC Ministries ဟူ၍ဖြစ်လာပြီး နောက်ဆုံး ၂၀၁၅ တွင် Our Daily Bread Ministries ဟူ၍ဖြစ်လာပါသည်။ ယခုတွင် ကျွန်ုပ်တို့သည် Our Daily Bread စာအုပ်တစ်မျိုးတည်းသာမဟုတ်တော့ဘဲ ဘုရားလူတို့အား ၎င်းတို့၏သခင်ဘုရားနှင့်လျှောက်လှမ်းသောအသက်တာအတွက် အထောက်အကူ ဖြစ်စေမည့် ခရစ်ယာန်စာပေများကို ကျယ်ပြန့်စွာထုတ်ဝေလျက် ရှိပါသည်။ နှစ်စဥ် နိုင်ငံပေါင်း ၁၅၀ ၌ ဘာသာပေါင်း ၄၀ ကျော်ဖြင့် အထောက်အကူပြု စာအုပ်စာပေ သန်း ၆၀ ကျော်ကို ထုတ်ဝေဖြန့်ချိနေပါသည်။
မြန်မာနိုင်ငံရှိ နေ့စဥ်ခွန်အားအမှုတော်လုပ်ငန်းသည်လည်း နှိမ့်ချမှုဖြင့် အောက်ခြေမှပင် စတင်ခဲ့ရပါသည်။ ၁၉၉၃ ခုနှစ်တွင် “ခရစ်တော်အတွက်လူငယ်”အဖွဲ့အစည်း(စင်္ကာပူ)၏ ညွှန်ကြားရေးမှူး မစ္စတာ အဲလ်ဘတ်လီသည် အင်္ဂလိပ်ဘာသာ Our Daily Bread ကို ယူဆောင်လာပြီး မြန်မာနိုင်ငံတွင် နေ့စဥ်ဝတ်ပြုကိုးကွယ်မှုအတွက်အသုံးပြုရန် ၎င်းကို ဘာသာပြန်ပြီး ထုတ်ဝေဖြန့်ချိရန် အားပေးတိုက်တွန်းခဲ့ပါသည်။
ဤသို့ဖြင့် Our Daily Bread ကို ဘာသာပြန်ရန် ခွင့်ပြုချက်ရရှိခဲ့ပြီး “ခရစ်တော်အတွက် လူငယ်”အဖွဲ့အစည်း (မြန်မာ)နှင့် မိတ်ဖက်လုပ်ဆောင်ကာ အခြားသော တိုင်းရင်းသားဘာသာ (၁၄) ခု သို့ပါ ဘာသာပြန်ဆိုလျက် ထုတ်ဝေဖြန့်ချိနိုင်ခဲ့ပါသည်။ ကျွန်ုပ်တို့၏စိတ်ဆန္ဒက ရိုးရှင်းပါသည်။ မြန်မာပြည်ရှိယုံကြည်သူများ များနိုင်သမျှ လူများစွာတို့ ဘုရားသခင်နှင့် နီးကပ်အကျွမ်းဝင်ရေး၊ ဘုရား၏နှုတ်ကပတ်တော်မှ မျှော်လင့်ခြင်းနှင့် ခွန်အားပေးမစမှုကို ရှာဖွေတွေ့ရှိရေးအတွက် ကျွန်ုပ်တို့ ကူညီလိုခြင်းဖြစ်ပါသည်။ အစပျိုးအားထုတ်မှုသည် အောင်မြင်မှုရရှိခဲ့သည်။ သို့သော်လည်း နှစ်အတန်ကြာသည်နောက် ဘာသာပြန်ဆိုပေး မည့်သူ မရှိသည့် အခက်အခဲကြောင့် အချို့သော တိုင်းရင်းသားဘာသာများကို ရပ်ဆိုင်း ခဲ့ရပါသည်။ နေ့စဥ်ခွန်အားအမှုတော်လုပ်ငန်းအနေဖြင့် နောက်ဆုံးတွင် မြန်မာနိုင်ငံ ခရစ်ယာန် အသင်းတော်များကောင်စီ၏ ၂၀၁၀ ခုနှစ် (၈၃) ကြိမ်မြောက် နှစ်ပတ်လည် အစည်းအဝေးတွင် မြန်မာနိုင်ငံခရစ်ယာန်အသင်းတော်များကောင်စီနှင့် ပူးပေါင်းဆောင်ရွက်သည့် အသင်းအဖွဲ့အစည်းအဖြစ် စာရင်းသွင်းပါဝင်လာ နိုင်ခဲ့ပါသည်။ ယခုတွင် ကျွန်ုပ်တို့၌ ဝန်ထမ်း ၆ ဦး ရှိနေပြီး Our Daily Bread (နေ့စဥ်ခွန်အား) စာအုပ်ကို အင်္ဂလိပ်၊ မြန်မာနှင့် စကောကရင်ဘာသာတို့ဖြင့် ထုတ်ဝေဖြန့်ချိလျက်ရှိပါသည်။ ကျွန်ုပ်တို့၏မိတ်ဖက်အမှုတော် အသင်းတော်များအနေဖြင့်လည်း ကချင်၊ ဖလမ်းချင်း၊ လိုင်ချင်း၊ စီးယင်းချင်း၊ တီးတိန်ချင်း အစရှိသည့် အခြားသော တိုင်းရင်းသားဘာသာ (၅) မျိုးဖြင့် Our Daily Bread ကို ဘာသာပြန်ထုတ်ဝေနေပါသည်။
“နေ့စဥ်ခွန်အား” ဝတ်ပြုကိုးကွယ်ခြင်းစာစောင်အပြင် ခရစ်ယာန်များ၏ယုံကြည်ခြင်း အသက်တာ အတွက် အထောက်အကူပြုမည့် “လေ့လာမှတ်သားဖွယ်စာစဥ်” (Discovery Series)၊ “သမ္မာကျမ်းစာအတွင်း စွန့်စားဖြတ်သန်းခြင်း” (“Adventuring through the Bible” commentaries) နှင့် အခြားသော ခရစ်ယာန်စာပေများကို ထုတ်ဝေပါသေးသည်။ စာဖတ်သူမိတ်ဆွေများအနေဖြင့် ကျွန်ုပ်တို့၏ ဝက်ဘ်ဆိုဒ်၊ mobile app နှင့် Facebook မှတစ်ဆင့် နေ့စဥ်ခွန်အား အသံဖိုင်နှင့် အခြားသော စာအုပ်စာပေများကို ရရှိနိုင်ပါသည်။
နေ့စဥ်ခွန်အားအမှုတော်လုပ်ငန်း(မြန်မာပြည်) အား အဖွဲ့အစည်းတစ်ခုခု၊ ဂိုဏ်းဂဏအသင်းတော်တစ်ပါးပါးမှ၊ အမေရိကန်နိုင်ငံရုံးအဖွဲ့မှ ငွေရင်းရံပုံငွေ မတည်ပေးခြင်း၊ အမြဲအထောက်အပံ့ရရန် ငွေပင်ငွေရင်း ပစ္စည်းတစ်စုံတစ်ရာ စောင်ထားခြင်းများမရှိပါ။ ကျွန်ုပ်တို့သည် မြန်မာပြည်နှင့် အခြားသောနေရာဒေသ အသီးသီးမှ လူတစ်ဦးချင်းစီ၏ထောက်ပံ့ပေးလှူမှုဖြင့်သာ ရပ်တည်ပြီး၊ ဘုရားလူတို့အတွက် အမှုတော်ကို ဆက်လက်လုပ်ဆောင်နေပါသည်။ ကျေးဇူးတော်အားဖြင့်သာ ဘုရားသခင်သည် ငွေကြေးပိုင်း၊ ပစ္စည်းပိုင်း၊ ဝိညာဥ်ရေးပိုင်းတို့တွင် ကျွန်ုပ်တို့ကို မစ ထောက်ပံ့မည့်သူများစွာကို စေလွှတ်ပေးခဲ့ပါသည်။ အသက်တာကို ပြောင်းလဲစေသော သမ္မာကျမ်းစာမှပညာတော်ကို မြန်မာပြည်မှ လူတိုင်းနားလည်စေရေး၊ လူတိုင်းရရှိစေရေး အမှုတော်အတွက် သင်လည်း ကျွန်ုပ်တို့နှင့်အတူ ပါဝင်မည့်အကြောင်း ကျွန်ုပ်တို့ဆုတောင်းပါသည်။
နေ့စဥ်ခွန်အားအမှုတော်လုပ်ငန်းကို စိတ်ဝင်စားသောကြောင့် ကျေးဇူးတင်ပါသည်။