အင်္ဂလန်မြောက်ပိုင်း၌ Cuthbert (ခါ့ဗက်ထ်)သည် လူအများ၏မေတ္တာခံယူရသူဖြစ်သည်။ သူသည် ၁၇ ရာစုအတွင်း ဒေသအတော်များများ၌ ဧဝံဂေလိတရားဝေငှခြင်း ကဏ္ဍ၌ တာဝန်ရှိသူဖြစ်ပြီး တော်ဝင်မျိုးနွယ်များကို အကြံပေးဆွေးနွေးခြင်းနှင့် တိုင်းပြည်အရေးကိုလည်း သြဇာလွှမ်းမိုးသူဖြစ်သည်။ သူသေဆုံးပြီးနောက်ပိုင်း သူ့အားဂုဏ်ပြုသောအားဖြင့် Durham (ဒါရမ်)မြို့ကို တည်ခဲ့သည်။ သို့သော် Cuthbert ချန်ခဲ့သောအမွေအနှစ်မှာ ဤအရာများထက်သာလွန်ပါသည်။

မြောက်ပိုင်းဒေသ၌ ပုလိပ်ကပ်ရောဂါဖြစ်ပွားချိန်တွင် Cuthbert သည် ရောဂါဘေးသင့်သည့်မြို့များရှိ လူတို့ကို သွားရောက်အားပေးနှစ်သိမ့်ခဲ့သည်။ ရွာတစ်ရွာမှထွက်ပြီး ခရီးဆက်ကာနီးတွင် ကလေးငယ်တစ်ဉီးကို ပွေ့ဖက်ထားသည့် မိခင်တစ်ဦးအတွက် ဆုတောင်းပေးရန် ကျန်နေသေးကြောင်းတွေ့ရသည်။ သူမသည် သားတစ်ဦးကိုဆုံးရှုံးခဲ့ရပြီး ယခုချီထားသည့် ကလေးမှာလည်း သေလုနီးပါးဖြစ်နေ သည်။ Cuthbert သည် အဖျားတက်နေသည့်ကလေးလက်ကို ဆုပ်ကိုင် ဆုတောင်းပေးပြီး သူ့နဖူးကိုနမ်းလိုက်ကာ မိခင်အား “မစိုးရိမ်ပါနဲ့။ နောက်ထပ် မင်းရဲ့အိမ်သားတွေ မသေတော့ပါဘူး” ဟုပြောလိုက်သည်။ ထိုသားလေးမှာ အသက်ရှင်ခဲ့သည်။

တစ်ချိန်က ရှင်ယေရှုသည် ကြီးမြတ်ခြင်းနှင့်ပတ်သက်၍ သင်ခန်းစာပေးရန် သူငယ်တစ်ဦးကို ချီလျက် “အကြင်သူသည် ငါ၏မျက်နှာကိုထောက်၍ ဤကဲ့သို့ သော သူငယ်တစ်စုံတစ်ယောက်ကို လက်ခံ၏။ ထိုသူသည် ငါ့ကိုပင်လက်ခံ၏”ဟုဆိုခဲ့သည် (မာ ၉:၃၇)။ လူတစ်ဦးကို “လက်ခံ”ခြင်းသည် ဂျူးယဉ်ကျေးမှု၌ အိမ်ရှင်က ဧည့်သည်ကို ဧည့်ဝတ်ပြုရသကဲ့သို့ အလုပ်အကျွေးပြုခြင်းဟု အဓိပ္ပာယ်ရပြီး၊ ကလေးများက အပြုစုခံခြင်းထက် လူကြီးကို ပြုစုပေးကြရ၍ ဤအတွေးအခေါ်က အံ့သြတုန်လှုပ်စရာဖြစ်ခဲ့လိမ့်မည်။ ယေရှု၏အဓိကဆိုလိုရင်းမှာ စစ်မှန်သောကြီးမြတ်မှုသည် အငယ်ဆုံးသော၊ အနိမ့်ကျဆုံးသောသူကို အစေခံခြင်းတည်း (:၃၅)။

တော်ဝင်မျိုးနွယ်များ၏အကြံပေးဖြစ်သူ၊ သမိုင်းကိုလွှမ်းမိုးနိုင်သူ၊ မြို့တစ်မြို့ တည်ပေးခြင်းအားဖြင့် ဂုဏ်ပြုခံရသူဖြစ်သော်လည်း Cuthbert ၏အမွေအနှစ် ကား မိခင်တစ်ဦးကိုသတိပြုမိခြင်း၊ နဖူးထက်အနမ်းတစ်ပွင့်ဖြင့် သူ၏ အရှင်သခင်ကို ထင်ဟပ် ဖော်ပြသည့် နှိမ့်ချသောအသက်တာပင်ဖြစ်တော့သည်။