ကလေးတစ်ဦးငိုသောအခါ ထိုကလေးသည် ပင်ပန်းပြီး ဆာလောင်နေသော လက္ခဏာပင်ဖြစ်သည်။ မှန်ပါသလား။ အမေရိကန်နိုင်ငံရှိ ဘရောင်းတက္ကသိုလ် (Brown University)မှ ဆရာဝန်များ၏အဆိုအရ မွေးကင်းစကလေးငယ် ငိုကြွေးခြင်း၌ ထူးခြားပြီး မသိသာသော ကွဲပြားခြားနားမှုသည် အခြားပြဿနာများအတွက် အရေးကြီးသော သဲလွန်စများကိုလည်း ပေးစွမ်းနိုင်သည်။ ဆရာဝန်များသည် ကွန်ပြူတာပရိုဂရမ်တစ်ခုကို ရေးဆွဲခဲ့ကြပြီး၊ ထိုပရိုဂရမ်မှာ အသံနှုန်းအနိမ့်အမြင့်၊ အတိုးအကျယ်၊ ငိုကြွေးသံ မည်မျှ ရှင်းသည်၊ မရှင်းသည်ကို တိုင်းတာကာ ကလေးငယ်၏ ပင်မအာရုံကြောစနစ် တစ်စုံတစ်ရာ မှားယွင်းမှုရှိမရှိကို ဆုံးဖြတ်ပေးသည်။
ဘုရားသခင်သည် သူ၏လူတို့၏ကွဲပြားခြားနားသော ငိုကြွေးသံများကို ကြားပြီး ၎င်းတို့၏စိတ်နှလုံးသား အခြေအနေများကို စိစစ်သတ်မှတ်ကာ ကျေးဇူးတော်ဖြင့် တုံ့ပြန်မည်ဟု ဟေရှာယ ပရောဖက်ပြုခဲ့သည်။ ယုဒလူမျိုးတို့သည် ဘုရားသခင်နှင့် ဆွေးနွေးတိုင်ပင်ခြင်း ပြုမည့်အစား ကိုယ်တော်၏ပရောဖက်ကို လျစ်လျူရှုကာ အီဂျစ်ပြည်ကို မဟာမိတ်ပြု၍ အကူအညီတောင်းခဲ့သည် (ဟေရှာ ၃၀:၁-၇)။ သူတို့ဆက်ပြီးအာခံဆန့်ကျင်နေပါက သူတို့အား ရှုံးနိမ့်ခြင်းနှင့် အရှက်ကွဲခြင်းကို ဖြစ်စေမည်ဟု ဘုရားသခင်မိန့်ကြားခဲ့သော်လည်း “ထာဝရ ဘုရားသည် (သူ)တို့၌ ကျေးဇူးပြုလိုသောငှာ မျှော်လင့်တော်မူ”သည် (:၁၈)။ နောင်တနှင့် ယုံကြည်ခြင်းဖြင့် အော်ဟစ်ခေါ်မှသာလျှင် ကယ်တင်ခြင်းခံရမည်ဖြစ်သည်။ သူ၏လူတို့သည် သူ့ကို အော်ခေါ်ပါက ဘုရားရှင်သည် ၎င်းတို့၏ အပြစ်ကို ခွင့်လွှတ်ပြီး၊ ၎င်းတို့၏ ဝိညာဥ်ရေးရာခွန်အားနှင့် ဖျတ်လတ် တက်ကြွ သောအစွမ်းများကို အသစ်တစ်ဖန် အားသစ်လောင်းပေးမည် ဖြစ်သည် (:၈-၂၆)။
ယနေ့ သခင်ခရစ်တော်၌ ယုံကြည်သူများအတွက်လည်း အလားတူပင်ဖြစ်သည်။ နောင်တနှင့် ယုံကြည်ခြင်းဖြင့် တစ်မူကွဲပြားထူးခြားသော ကျွန်ုပ်တို့၏ ငိုကြွေးသံများသည် ကောင်းကင်ဘုံရှင် အဘခမည်းတော်နားသို့ ပေါက်လျှင် ကိုယ်တော်နားညောင်းကာ ခွင့်လွှတ်ပြီး၊ ကျွန်ုပ်တို့၏ ဝမ်းမြောက်ခြင်းနှင့် မျှော်လင့်ခြင်းကို အသစ်ပြုပြင်ပေးမည်ဖြစ်သည်။
