ရာဇဝတ်မှုများကို ကိုယ်တိုင်နှိမ်နင်းသည့် သူရဲကောင်းတစ်ဦးအကြောင်း ရိုက်ကူးထားသော ရုပ်ရှင်တစ်ခုတွင် ဇာတ်လိုက်ဖြစ်သူသည် မဖြစ်နိုင်သောအလုပ်တစ်ခုကို ဆင်နွှဲနေရသကဲ့သို့ ဖြစ်နေသည်။ သူနေထိုင်ရာ မြို့ကြီးသည် အကြမ်းဖက်မှုများ၊ ခိုးဆိုးလုနှိုက်မှုများဖြင့် ပြည့်နှက်နေရုံသာမက ရဲတပ်ဖွဲ့၊ တရားရုံးစနစ်နှင့် ပြည်သူ့ဝန်ထမ်းများပါ လာဘ်စားအကျင့်ပျက်နေကြောင်း သူ တွေ့ရှိခဲ့၍၊ ဤမြို့ကို လက်လွတ်စွန့်ခွာသွားချင်စိတ် အကြိမ်ကြိမ် ဖြစ်ပေါ်ခဲ့သည်။ သို့သော် ကျွန်မတို့၏ သူရဲကောင်းသည် လူတို့အမှန်တကယ် လိုအပ်နေသောအရာမှာ မျှော်လင့်ခြင်း ဖြစ်ကြောင်း နားလည်ခဲ့သဖြင့် သူသည် မြို့တွင် ဆက်နေရန် ရွေးချယ်ခဲ့သည်။

ထိုစိတ်ကူးယဉ်ကမ္ဘာသည် ကျွန်မတို့၏လက်ရှိလောကနှင့် သိပ်ပြီး မကွာခြားလှပါ။ ပတ်ဝန်းကျင်၌ မကောင်းမှုများ ရှိနေသည်။ အာဏာရှိသူများကလည်း ကျွန်မတို့ကို စိတ်ပျက်စေသည်။ သို့သော် အခြေအနေများ မည်မျှပင် မှောင်မိုက်နေပါစေ ဘုရားသခင်သည် သူ၏လူတို့ကို မည်သည့်အခါမျှ စွန့်ပစ်တော်မမူသဖြင့် ဝမ်းမြောက်စရာဖြစ်သည်။ ပဋိညာဉ်သေတ္တာတော်ကို ယေရုရှလင်မြို့သို့ သယ်ယူပြီးနောက် ဒါဝိဒ်မင်းကြီး သီဆိုခဲ့သော ချီးမွမ်းခြင်းသီချင်းတွင် ယင်းသက်သေကို တွေ့ရသည်။ “ပဋိညာဉ်တရားတော်ကို အစဉ်အမြဲ အောက်မေ့”လျက်(၅ ရာ ၁၆ :၁၅)၊ လူတို့ကို ကတိထားရာပြည်သို့ သစ္စာရှိစွာ ပို့ဆောင်ပေးခဲ့သော ဘုရားသခင်ကို ချီးမွမ်းကြရန် ဒါဝိဒ်မင်း နှိုးဆော်တိုက်တွန်းခဲ့သည် (:၁၈)။

ဣသရေလနိုင်ငံ ပတ်လည်၌ အင်အားကြီး ရန်သူနိုင်ငံများ၏ ခြိမ်းခြောက်မှုများ ရှိနေပြီး၊ လူတို့တွင်လည်း ညည်းတွားခြင်းနှင့် ရုပ်တုကိုးကွယ်ခြင်းများ ရှိနေသည့်တိုင် “သူတို့ကို ညှဉ်းဆဲစေခြင်းငှာ အဘယ်သူအားမျှ အခွင့်ပေးတော်မမူ”(:၂၁)။ ဘုရားသခင်သည် ဣသရေလလူမျိုးတို့အား တန်ခိုးတော် (:၁၁)၊ အံ့ဩဖွယ်ရာများနှင့် နိမိတ်လက္ခဏာများ၊ ဖြောင့်မတ်သော စီရင်တော်မူချက်များ(:၁၄) ကို ပြသလျက် တောကန္တာရတစ်လျှောက် လမ်းပြခဲ့သည်။ ဘုရားသခင်၏ကြီးမားသောကရုဏာတော်ကြောင့်(:၃၄)၊ လူမျိုးတော်တို့၌ အနာဂတ်အတွက် မျှော်လင့်ချက် ရှိခဲ့ကြသည်။ ယနေ့ခေတ်တွင်လည်း ထိုနည်းတူပင်။ ဘုရားသခင်သည် ကျွန်မတို့ကို မစွန့်ပစ်၊ ကျွန်မတို့ ရင်ဆိုင်နေရသော မည်သည့်မကောင်းမှုထက်မဆို ကိုယ်တော် သာ၍ အင်အားကြီးမားကြောင်း ကျွန်မတို့ ယုံကြည်ကိုးစားနိုင်ပါသည်။