မိသားစု၏ခွေးကို အပြင်ခေါ်သွားပြီး ကျောင်းနေစဥ် ကျွန်မ၏တူ အင်ဒီ ကားတိုက်ခံခဲ့ရသည်။ လူတစ်ယောက်က ထိုမတော်တဆမှုကို မြင်ခဲ့ပြီး၊ အရေးပေါ် စီပီအာရ် နည်းဖြင့် နှလုံးပြန်ခုန်ရန် ကူညီပေးကာ၊ လူနာတင်ယာဥ်ကိုလည်း ခေါ်ပေးခဲ့သည်။ အသက်ရှုစက် အကူအညီဖြင့် တစ်ပတ်ကြာမျှ အင်ဒီ အသက်ရှင်ခဲ့သည်။ သူ့အား ကုသသောဆေးဝါးများကိုလည်း အံ့ဩဖွယ် လျော့ချနိုင်ခဲ့ပြီး၊ ခရစ်စမတ်အပြီး နောက်တစ်နေ့၊ သူ၏အခြေအနေ ပြန်လည်တည်ငြိမ်လာခဲ့ချိန်တွင် သူ၏ဇနီး၊ မိဘ၊ အစ်ကိုနှင့် ကလေးငါးယောက်တို့အား “မင်းတို့ကို ငါချစ်တယ်နော်”ဟု ပြောခဲ့သည်။ စိတ်ခံစားချက်နှင့် မျှော်လင့်ချက်တို့ တစ်ဖန်မြင့်တက်လာခဲ့သည်။ သို့သော် နောက်တစ်ရက်တွင် သူကွယ်လွန်သွားသည်။

အသက် ၁၅ နှစ်မှ ၂၁ နှစ်အရွယ်ရှိသည့် သူ၏ကလေးအားလုံးက ဘုရားသခင်အား ချီးမြှောက်သော သူ၏အောက်မေ့ဖွယ်ဝတ်၌ မျက်ရည်များကျလျက် စကားပြောခဲ့ကြသည်။ သမီး ဂျူလီယာက “ငါတို့ရဲ့ဆုံးရှုံးမှု ဘယ်လောက်ကြီးမားတယ်လို့ ပြောစရာအကြောင်း မရှိပါ။ ငါတို့မှာ ဘယ်လောက်များများ ကျန်ရစ်ရှိနေခဲ့လဲဆိုတာကို ပြောရမှာပါ”ဟူသည့် ကိုးကားချက်ကို ရွတ်ဖတ်ခဲ့ရာ၊ ၎င်းသည် တက်ရောက်လာသူများအတွက် တွေးစရာဖြစ်စေခဲ့သည်။

ယေရှုအတွက် လှပသောအသက်တာကို ရှင်သန်ခဲ့သည့် အင်ဒီ၏သေဆုံးမှု သည် သူ့ကို သိကျွမ်းပြီး ချစ်ခင်သူများအဖို့ အမှန်တကယ်ကြီးမားသော ဆုံးရှုံးမှုဖြစ်ပြီး၊ သူ့အား လွန်စွာသတိရခဲ့ကြသည်။ သို့သော် ကျွန်မတို့အတွက် မျှော်လင့်ချက်ကို ဖြစ်စေသည့် မည်သည့်အရာ ကျန်ရှိသနည်း။ ဧဖက်သြဝါဒစာ ၁ တွင် ယေရှုအားဖြင့် အင်ဒီနှင့် အခြားယုံကြည်သူများ၌ရှိသော ဝိညာဥ်ရေးရာ ကောင်းချီးများကို ဖော်ပြထားသည်။ ကျွန်မတို့သည် မျက်မှောက်တော်၌ “အပြစ်တင်ခွင့်နှင့် ကင်းလွတ်”လျက် (:၄)၊ “သားအရာကို ရမည်အကြောင်း ခွဲခန့်မှတ်သားထားခြင်းခံရသည်”(:၅)။ “သားတော်၏အသွေးတော်အားဖြင့် ရွေးနှုတ်ခြင်း ခံရသူ”၊ “ဘုရားသခင်၏ ကျေးဇူးတော်ကြောင့် အပြစ်မှ ခွင့်လွှတ်ခြင်းကို ခံရသူ”များဖြစ်သည် (:၇)။ “ကတိထားတော်မူသော သန့်ရှင်းသောဝိညာဥ်တော်”သည် ကျွန်မတို့အတွင်း၌ အသက်ရှင်လျက်ရှိပြီး၊ ထာဝရကာလ၌ “ကိုယ်တော်နှင့်အတူ အမွေခံရန်” ကျွန်မတို့အား ကတိပေးထားသည် (:၁၃-၁၄)။ ယေရှုကို ချစ်သောသူများ၌ ကိုယ်တော်၏ ထာဝရကယ်တင်ခြင်းလက်ဆောင်ရှိသည်။