ပျိုးပင်စိုက်ခင်း ပိုင်ရှင်တစ်ဦးသည် မက်မွန်ပျိုးပင်ကိုရောင်းရန် ဖြစ်နိုင်ခြေနည်းလမ်း အမျိုးမျိုးကို စဥ်းစားသည်။ အရွက်ဝေဖြာ ပျိုးပင်ငယ်များကို ဆာလာအိတ်ထဲတွင် တန်းစီပြီး လှလှပပ ခင်းကျင်းပြသရမည်လား။ ရာသီအလိုက်ပေါက်ရောက်သော အရောင်အသွေးစုံသည့် မက်မွန်ပင်ပုံများနှင့် စာအုပ်ဖန်တီးရမည်လား။ နောက်ဆုံးတွင် မက်မွန်ပင် ရောင်းထွက်စေမည့်အရာကို သူသိသွားသည်။ အနံ့ချိုမွှေးပြီး လိမ္မော်ရင့်ရောင် အမွှေးထူအခွံနှင့် မက်မွန်သီး ဖြစ်သည်။ မက်မွန်ပင်ကို ရောင်းရန် အကောင်းဆုံးနည်းလမ်းမှာ မက်မွန်သီးမှည့်ကို ခူး၊ အချိုရည်များ လက်ပေါ်သို့ အစက်စက်ကျသည်အထိ အသီးကိုခွဲပြီး ဝယ်ယူသူအား အသီးတစ်စိတ် ကမ်းပေးကာ အရသာကိုမြည်းစေခြင်းဖြစ်သည်။ အရသာကို မြည်းစမ်းပြီးနောက် မက်မွန်ပင်ကို သူတို့ဝယ်ချင်သွားမည် ဖြစ်သည်။

ဘုရားသခင်က သူသည် “ချစ်ခြင်း၊ ဝမ်းမြောက်ခြင်း၊ ငြိမ်သက်ခြင်း၊ စိတ်ရှည်ခြင်း၊ ကျေးဇူးပြုခြင်း၊ ကောင်းမြတ်ခြင်း၊ သစ္စာစောင့်ခြင်း၊ နူးညံ့သိမ်မွေ့ခြင်း၊ ကာမဂုဏ်ချုပ်တည်းခြင်း” ဟူသော ဝိညာဥ်အသီးများ လွှမ်းခြုံထားသူအဖြစ် သူ့ကိုယ်သူ ထင်ရှားဖွင့်ပြခဲ့သည် (ဂလ ၅:၂၂-၂၃)။ သခင်ယေရှုကို ယုံကြည်သူများ၌ ဤကဲ့သို့သောအသီးများ ပေါ်လွင်နေပါက အခြားသူများလည်း ထိုအသီးကို လိုချင်လာမည်ဖြစ်ကာ အလွန်ဆွဲဆောင်သည့် ထိုအသီး၏အရင်းအမြစ် ဖြစ်သည့် ဘုရားသခင်ကို ရှာဖွေလာမည်ဖြစ်သည်။

သစ်သီးသည် ကျွန်ုပ်တို့၏အသက်တာ၌ သန့်ရှင်းသောဝိညာဥ်တော်၏ လွှမ်းမိုးမှုတည်းဟူ‌သော ဘုရားသခင်နှင့် အတွင်းမိတ်သဟာယပြုဆက်ဆံရေးကြောင့် ထင်ရှားလာသည့် အပြင်ပန်းရလဒ် ဖြစ်သည်။ သစ်သီးသည် ကျွန်ုပ်တို့ ကိုယ်စားပြုသော ဘုရားသခင်ကို လူတို့သိရန် ဆွဲဆောင်ဖိတ်ခေါ်နေသည့် အပြင်အဆင်ပင်ဖြစ်သည်။ တောက်ပသောမက်မွန်သီးများသည် သစ်စိမ်းရွက်များကြားတွင် ပေါ်လွင်ထင်ရှားနေသကဲ့သို့ ဝိညာဥ်အသီးများသည်လည်း ဆာလောင်နေသော လောကကြီးအား “ဒီမှာအစာရှိတယ်။ လာပါ။ ပင်ပန်းမောဟိုက်ပြီး စိတ်ဓာတ်ကျ အားငယ်နေတဲ့သူတွေအတွက် ဒီမှာ ထွက်ပေါက်ကို လာရှာပါ။ ဒီမှာ ဘုရားသခင်နဲ့ လာတွေ့ပါ”ဟု ကြေညာခေါ်ယူနေတော့သည်။