တတိယမြောက်မျိုးဆက် လယ်သမားလေးဂျင်းမ်သည် ထာဝရအသက်ကို ပေးမည့် သခင်၏ကမ်းလှမ်းချက်ကို ဆုတောင်းလက်ခံခဲ့ပြီး “ငါ၏နာမတော် ကို ကြောက်ရွံ့သော … သင်တို့သည် ထွက်သွား၍ တင်းကုပ်၌ နွားသငယ်ကဲ့သို့ ခုန်ကြလိမ့်မည်” (မာလ ၄:၂) ဟူသည့်ကျမ်းချက်ကို ဖတ်ရသောအခါ သူ အလွန်စိတ်လှုပ်ရှားဝမ်းမြောက်ခဲ့သည်။ သူ၏နွားများသည် ၎င်းတို့အား ပိတ်လှောင်ထားသည့်တင်းကုပ်မှ လျင်မြန်မြူးတူးစွာ ခုန်ပေါက်ထွက်သွားပုံကို သူရှင်းလင်းစွာ သတိရလျက် စစ်မှန်သော လွတ်မြောက်ခြင်းကိုပေးသည့် ဘုရားသခင်၏ကတိတော်ကို ဂျင်းမ် နောက်ဆုံးနားလည်ခဲ့သည်။
မာလခိအနာဂတ္တိကျမ်း အခန်းကြီး ၄ ၌ ပရောဖက်မာလခိ ဖော်ပြထားသည့် ဘုရားသခင်ကိုကြည်ညိုပြီး အဆုံးတိုင်အောင် သစ္စာရှိသည့်လူစုနှင့် မိမိကိုယ့်ကိုသာ ကိုးစားသည့်လူစု၏ ခြားနားကွဲပြားမှု (မာလ ၄:၁-၂)ကို ကျွန်ုပ်တို့ဆွေးနွေးစဥ် ဂျင်းမ်၏သမီးက ဤအကြောင်းကို ပြောပြခဲ့ခြင်းဖြစ်ပါသည်။ ဘာသာရေး ခေါင်းဆောင်များအပါအဝင် ဣသရေလလူမျိုး အတော်များများက ဘုရားသခင် နှင့် သစ္စာရှိသောအသက်ရှင်မှုအတွက် ဘုရား၏ စံညွှန်းများကို လျစ်လျူရှုချိန်တွင် ဘုရားရှင်နောက် လိုက်လျှောက်ရန် သူတို့ကို ပရောဖက်က နှိုးဆော်သည် (၁:၁၂-၁၄၊ ၃:၅-၉)။ ဤအုပ်စုနှစ်စုကို ဘုရားသခင် နောက်ဆုံးခွဲခြားမည့်အချိန် ရောက်လာ တော့မည်ဖြစ်သောကြောင့် ၎င်းတို့အား သစ္စာရှိစွာအသက်ရှင်ကြရန် မာလခိက တိုက်တွန်းခြင်းဖြစ်သည်။ ဤအခြေအနေတွင် မာလခိက “တရားတော်နေမင်း သည် အနာပျောက်စေသောအတောင်တို့နှင့် ပေါ်ထွန်းတော်မူ”သောအခါ သစ္စာရှိသူများ ကြုံတွေ့ရမည့် ပြောမပြနိုင်လောက်သော ဝမ်းမြောက်မှုကို မြူးတူးခုန်ပေါက်သည့် နွားသူငယ် ဥပမာအားဖြင့် ဖော်ပြခဲ့သည် (၄:၂)။
စစ်မှန်သည့်လွတ်မြောက်ခြင်းကို လူသားအားလုံးရရှိနိုင်ကြောင်း သတင်းကောင်းကို ဆောင်ယူလျက် (လု ၄:၁၆-၂၁)၊ ဤကတိတော်ကို နောက်ဆုံး ပြီးပြည့်စုံစေခဲ့သူမှာ သခင်ယေရှုပင်ဖြစ်သည်။ တစ်နေ့တွင် ဘုရားသခင် အသစ်ပြုပြင်လျက် ဖန်ဆင်းတည်စေသည့်ကမ္ဘာတွင် ကျွန်ုပ်တို့အားလုံး ဤလွတ်မြောက် ခြင်းကို အပြည့်အဝခံစားရမည်ဖြစ်သည်။ ထိုနေရာ၌ မြူးတူးရမည့်အရေးကား မည်သို့မျှဖော်မပြနိုင်သော ဝမ်းမြောက်မှုပင်ဖြစ်တော့သည်။
