ဣသရေလလူတို့ကို ဖာရောဘုရင် လွှတ်သောနောက်၊ ဖိလိတ္တိပြည်ကို လျှောက်သောလမ်းသည် ဖြောင့်သော်လည်း ထိုလမ်းဖြင့် ဘုရားသခင် ဆောင်တော်မမူ။ (ထွက် ၁၃:၁၇)

အဆင်ပြေလွယ်ကူသောလမ်းလား

ဘဝခရီးလမ်းက ရံဖန်ရံခါ ခက်ခဲကြမ်းတမ်းတတ်သည်။ သို့ဖြစ်၍ ဘုရားသခင်သည် ကျွန်ုပ်တို့အား အဆင်ပြေချောမွေ့သောလမ်းသို့ အစဉ်ပို့ဆောင်မည် မျှော်လင့်ထားပါက ခရီးလမ်းကြမ်းလာလျှင် ကိုယ်တော့်ထံမှ လှည့်ပြန်ရန် သွေးဆောင်ခြင်းခံရပေမည်။

ထိုသို့ ဘုရားရှင်ထံမှ လှည့်ထွက်သွားရန် ကြံစည်မိသည်ဆိုပါက ဣသရေလ လူတို့အကြောင်းကို စဉ်းစားဆင်ခြင်လိုက်ပါ။ နှစ်ပေါင်း ရာနှင့်ချီပြီး အဲဂုတ္တုပြည်၌ ကျွန်ပြုခံရပြီးနောက် လွတ်မြောက်ခွင့်ရလာချိန်တွင် ကတိထားရာပြည်သို့ ရှေ့ရှု ထွက်ခွာလာသည်။ ဘုရားသခင်သည် သူတို့ကို အိမ်သို့ တန်းတန်းမတ်မတ် မပို့ဆောင်ပါ။ “ဖိလိတ္တိပြည်ကို လျှောက်သောလမ်းသည် ဖြောင့်သော်လည်း ထိုလမ်းဖြင့် ဘုရားသခင် ဆောင်တော်မမူ” (ထွက် ၁၃:၁၇)။ ယင်းအစား သူတို့အား ကန္တာရကိုဖြတ်စေပြီး ခက်ခဲသောလမ်းဖြင့် ပို့ဆောင်ခဲ့သည်။ လတ်တလောတွင် ၎င်းတို့သည် တိုက်ပွဲ များကို ရှောင်ရှားနိုင်ခဲ့ပြီး (:၁၇)၊ ရေရှည်အတွက်မူ သာ၍ ကြီးမြတ်သော အမှုတော်ရှိနေပါသည်။

ဘုရားသခင်သည် သူ့နောက်တော်လိုက်ရန် ရွေးနှုတ်ခေါ်တော်မူသောသူတို့ ရင့်ကျက်လာအောင် သွန်သင်ညွှန်ကြားရန် တော၌လှည့်လည် သွားခဲ့ရသည့်အချိန်များကို အသုံးပြုခဲ့သည်။ လွယ်ကူသောလမ်းက သူတို့အတွက် ဘေးအန္တရာယ်ဖြစ်စေနိုင်သည်။ ရှည်လျားသောခရီးလမ်းက ကတိထားရာပြည်သို့ အောင်မြင်စွာ ဝင်ရောက်နိုင်ရန် ဣသရေလလူတို့ကို ပြင်ဆင်ပြုပြင်ပေးခဲ့သည်။

ကျွန်ုပ်တို့၏ဘုရားသခင်သည် သစ္စာနှင့်ပြည့်စုံတော်မူ၍ ကျွန်ုပ်တို့ ဘာကိုဘဲ ကြုံတွေ့ရပါစေ၊ ကိုယ်တော်သည် ကျွန်ုပ်တို့ကို ခေါ်ဆောင်သွားမည်၊ ဂရုပြုမည် ဖြစ်ကြောင်း စိတ်ချယုံကြည်ထားနိုင်ပါသည်။ မိမိရောက်ရှိနေသော လမ်းနှင့် ပတ်သက်၍ နားမလည်နိုင်ဖြစ်ရလည်း လမ်းခရီးတစ်လျှောက်လုံးတွင် ယုံကြည်ခြင်းအရာ၌တိုးပွားကာ ရင့်ကျက်ကြီးထွားလာအောင် ဘုရားသခင် မစတော်မူမည်အကြောင်း စိတ်ချယုံကြည် နိုင်ပါသည်။ DAVE BRANON

သခင်ဘုရား၊ ရှေ့လာမည့် လမ်းခရီးကို ကျွန်ုပ်တို့ မမြင်နိုင်ပါ။
သို့ဖြစ်၍ ကိုယ်တော်၏လမ်းခရီးမှာ လမ်းမှန်ဖြစ်ကြောင်း၊ ကျွန်ုပ်တို့ လျှောက်လှမ်းရန် အသင့်လျော်ဆုံးလမ်းဖြစ်ကြောင်း စိတ်ချယုံကြည်ရမည်။
ကျွန်ုပ်တို့၏လမ်းခရီး၌ ကိုယ်တော့်အား ဦးဆောင်ညွှန်ကြားခွင့် ပေးတတ်ရန် သွန်သင်မူပါ။ ခွန်အားပေးမူပါ။