ဆင်းရဲခံဖူးသောသင်တို့၌ … ချမ်းသာခြင်းကို လည်းကောင်း၊ ဘုရားသခင် ဆပ်ပေး၍ တရားသဖြင့် စီရင်တော်မူလိမ့်မည်။ (၂ သက် ၁:၇-၈)


ယနေ့ဖတ်ရန် သမ္မာကျမ်းစာ ။ ။ သက်သာလောနိတ်ဩဝါဒစာဒုတိယစောင် ၁:၃-၁၂

ညီအစ်ကိုတို့၊ သင်တို့၏ယုံကြည်ခြင်းသည် အလွန်တိုးပွါး၍၊ လူတိုင်းအသီးသီးတို့သည် အချင်းချင်း ချစ်ခြင်းမေတ္တာနှင့် ပြည့်စုံကြသည်ဖြစ်၍ ငါတို့သည် ပြုသင့်သည်အတိုင်း သင်တို့ကြောင့် ဘုရားသခင်၏ ကျေးဇူးတော်ကို အစဉ်မပြတ်ချီးမွမ်းကြ၏။ သို့ဖြစ်၍၊ သင်တို့သည် ညှဉ်းဆဲခြင်း၊ ဒုက္ခဆင်းရဲခြင်းကို ခံရသမျှတို့၌ သည်းခံ၍ ယုံကြည်ခြင်းရှိသည်ကို ငါတို့သည် ထောက်၍၊ ဘုရားသခင်၏ အသင်းတော်များတွင် သင်တို့ကြောင့် ဝါကြွားကြ၏။ သင်တို့သည် ဘုရားသခင်၏နိုင်ငံတော်အတွက် ဆင်းရဲခံရ၍၊ ထိုနိုင်ငံတော်ကို ဝင်စားထိုက်သည်ဟု မှတ်တော်မူခြင်းကို ခံရစေခြင်းငှါ၊ တရားသဖြင့် ဘုရားသခင်စီရင်တော်မူခြင်းအမှုသည် ထိုသို့သောအားဖြင့် ထင်ရှားလျက်ရှိ၏။ အဘယ်သို့နည်းဟူမူကား၊ သခင်ယေရှုသည် တန်ခိုးရှိသော ကောင်းကင်တမန်တို့နှင့်အတူ၊ ကောင်းကင်ဘုံက ပေါ်ထွန်းတော်မူ၍၊ ဘုရားသခင်ကို မသိသောသူ၊ ငါတို့သခင်ယေရှုခရစ်၏ ဧဝံဂေလိတရားကို နားမထောင်သောသူတို့ကို မီးလျှံအားဖြင့် ဒဏ်ပေးတော်မူသောအခါ၊ သင်တို့ကို ဆင်းရဲစေဘူးသော သူတို့၌ဆင်းရဲခြင်းကိုလည်းကောင်း၊ ဆင်းရဲခံရဘူးသော သင်တို့၌ ငါတို့နှင့်အတူ ချမ်းသာခြင်းကိုလည်းကောင်း၊ ဘုရားသခင် ဆပ်ပေး၍ တရားသဖြင့် စီရင်တော်မူလိမ့်မည်။ ထိုသခင်သည် မိမိသန့်ရှင်းသူတို့အားဖြင့် ဂုဏ်အသရေတော် ထင်ရှားခြင်းကိုလည်းကောင်း၊ ငါတို့သက်သေကို သင်တို့သည် ယုံကြည်သည်ဖြစ်၍၊ ၁၀ ယုံကြည်သော သူအပေါင်းတို့အားဖြင့် အံ့ဩချီးမွမ်းခြင်းကိုလည်းကောင်း၊ ခံအံ့သောငှါ ကြွလာတော်မူသောနေ့ရက်၌၊ ထိုသူတို့သည် သခင်ဘုရား၏ မျက်နှာတော်နှင့်လည်းကောင်း၊ တန်ခိုးရှိသော ဘုန်းတော်နှင့်၎င်းကွာ၍ ထာဝရပျက်စီးခြင်းတည်းဟူသော အပြစ်ဒဏ်ကို ခံရကြလတံ့၊ ၁၁ ထိုကြောင့် ငါတို့ဘုရားသခင်နှင့် အရှင်ယေရှုခရစ်၏ ကျေးဇူးတော်အတိုင်း၊ ထိုသခင်၏နာမတော်ကို သင်တို့အားဖြင့် ဘုန်းထင်ရှားစေခြင်းငှါလည်းကောင်း၊ သင်တို့ကိုလည်း ထိုသခင်အားဖြင့် ဘုန်းထင်ရှားစေခြင်းငှာလည်းကောင်း၊ ၁၂ သင်တို့သည် ခေါ်တော်မူခြင်း ကျေးဇူးကို ခံထိုက်ကြသည်ဟု မှတ်တော်မူ၍၊ ကောင်းမြတ်တော်မူခြင်း၏ စေတနာအပေါင်းနှင့် သင်တို့၏ယုံကြည်ခြင်းအမှုကို တန်ခိုးနှင့်ပြည့်စုံစေတော်မူမည် အကြောင်း၊ ငါတို့သည် သင်တို့အဘို့ အစဉ်ဆုတောင်း ပဌနာပြုကြ၏။

ဒုက္ခရောက်သူအတွက် နှစ်သိမ့်သက်သာရာ

ချားလ်စ်ဒစ်ဆန် (Charles Dickens) ရေးသားသည့် ‘ဒေးဗစ်ကော့ပါးဖီး’ (David Copperfield) ၀တ္ထုမှ တူမောင် ‘ဒေးဗစ်ကော့ပါးဖီး’ အား ပထွေးဆိုးက အနိုင်ကျင့်ညှဉ်းဆဲရာ ကြီးတော်ဖြစ်သူက ရင်ဆိုင်ပစ်လိုက်သည့်အခန်းကို ကျွန်မသဘောကျလှသည်။

ဒေးဗစ်ကော့ပါးဖီးသည် ကြီးတော် ဘက်စီထရော့ဝု (Betsy Trotwood) ၏အိမ်သို့ ရောက်လာရာ သူ့ပထွေး မစ္စတာ မာ့စတုန်း (Mr. Murdstone)ကလည်း မလှမ်းမကမ်းမှ လိုက်ပါ လာသည်ကို ကြီးတော်က သဘောမတွေ့ပါ။ သားအပေါ် ရက်စက်စွာ ပြုမူမှုအတွက် သူ့အပေါ် မကျေနပ်ချက် တစ်သီကြီးကို ပထွေးခမျာ မငြင်းနိုင်အောင် ဘက်စီ ပြောချ လိုက်သည်။ ကြီးတော်၏စွဲချက်က ပြင်းထန်မှန်ကန်လွန်း သဖြင့် သာမန်ဆိုလျှင် ရန်လိုတတ်သော မစ္စတာ မာ့စတုန်း သည် ဘာတစ်ခွန်းမှ မပြောနိုင်ဘဲ ထွက်သွားတော့သည်။ ကြီးဒေါ်ဘက်စီ၏ခွန်အား၊ ကောင်းမြတ်ခြင်းအားဖြင့် အဆုံး၌ ဒေးဗစ်မှာ တရားမျှတမှုကို ခံစားရတော့သည်။

ခွန်အားကြီး၍ ကောင်းမြတ်သော၊ တစ်နေ့တွင် ဤကမ္ဘာရှိအမှားအယွင်းမျာကို ပြန်လည်တည့်မတ် မှန်ကန်စေမည့်သူတစ်ဦးရှိသည်။ သခင်ယေရှုပြန်လည်ကြွလာသော အခါတွင် ကောင်းကင်တမန်အပေါင်းတို့နှင့်အတူ ကြွဆင်းလာမည်။ “ဆင်းရဲခံဖူးသော သင်တို့၌ … ချမ်းသာခြင်း”ကို ဆပ်ပေးမည်။ သူ့သားသမီးများကို ဆင်းရဲစေသူများအား ကိုယ်တော် ဤအတိုင်းမထား၊ လျစ်လျူမရှုပါ (၂ သက် ၁:၆-၇)။ ထိုနေ့ရောက်ရှိသည့်တိုင်အောင် ကျွန်မတို့ ခိုင်မာတည်ကြည် စွာရပ်တည်ရန်၊ အားယူ၍ရဲရင့်ခြင်းရှိရန် သခင်ယေရှု အလိုရှိသည်။ ဤလောကမြေ၍ မည်မျှပင် သည်းခံခဲ့ရစေကာမူ ထာဝရကာလအတွက် စိတ်ချလုံခြုံရာ၌ ကျွန်မတို့ရှိနေပါသည်။ JENNIFER BENSON SCHULDT

အဘဘုရား၊ သန့်ရှင်းသောဝိညာဉ်တော်အားဖြင့် ကွယ်ကာလျက် ဉာဏ်အလင်းပေးမူပါ။
ကိုယ်တော်အား ကိုယ်စားပြုသူများဖြစ်သောကြောင့် ပြုမူလေရာရာ၌ တရားမျှတစွာ ပြုကျင့်ရန် မစတော်မူပါ။

တစ်နေ့တစ်ချိန်တွင် ဘုရားရှင်သည် အမှားအယွင်းများကို တည့်မတ်မှန်ကန်စေမည်။

<<ပြန်ဖတ်ရန် | ဆက်ဖတ်ရန်>>

စာမူအားလုံးဖတ်ရန် ဤနေရာတွင်နှိပ်ပါ။