စကော့တလန်နိုင်ငံ၊ ဘရိုရာ(Brora)ရွာလေးရှိ ကြမ်းတမ်းသောချောက်ကမ်းပါး များအောက်၌ သိုးလေးတစ်ကောင်မှာ ကယ်သူမဲ့နေသည်။ မတ်စောက်သောကျောက်ဆောင်က တစ်ဘက်၊ အခြားတစ်ဘက်တွင် ကြီးမားသော သမုဒ္ဒရာတို့ ဝန်းရံထားသည့် ချောက်ကမ်းပါး၌ ထိုသိုးလေး ပိတ်မိနေခဲ့သည်မှာ ၂ နှစ်ရှိခဲ့ပြီ။ ၎င်းကို ကယ်ရန် အကြိမ်ကြိမ်ကြိုးစားခဲ့သော်လည်း မအောင်မြင်ခဲ့ပါ။ နောက်ဆုံးတွင် ဆုံးဖြတ်ချက်ခိုင်မာသော လယ်သမားကြီး ကမ်မီဝီလ်ဆင် နှင့်သူငယ်ချင်းလေးဦးတို့သည် အန္တရာယ်များသည့်ကယ်ဆယ်ရေးမစ်ရှင်ကို အောင်မြင်စွာ စွမ်းဆောင်နိုင်ခဲ့ကြသည်။ သိုးလေးကိုကယ်ရန် ကယ်ဆယ်ရေး အဖွဲ့ဝင်သုံးဦးသည် သတ္တိများစွာမွေးပြီး၊ ချောက်ကမ်းပါးအောက်ဘက် ပေ ၈၂၀ နီးပါးအထိ ဝန်ချီစက်ကို သုံးကာ သတိကြီးစွာဖြင့် ဆင်းခဲ့ရသည်။

စိတ်ဓာတ်ခိုင်မာပြီး သနားတတ်သော လယ်သမားနှင့် သူ၏အဖွဲ့တို့သည် ယေရမိ ၂၃:၁-၃ မှ ကျွန်ုပ်တို့၏ချစ်သော အဘဘုရား၏သနားခြင်း ကရုဏာတော်ကို ထင်ဟပ်ပုံဖော်နေသည်။ ယုဒပြည်ရှိ ဆိုးညစ်သောခေါင်းဆောင်များအား “(ဘုရားသခင်၏)သိုးခြံထဲမှသိုးများကို ဖျက်ဆီးလျက် ကွဲလွင့်စေခဲ့သည့်” သိုးထိန်းများဟု ယေရမိ ပြစ်တင်ရှုတ်ချခဲ့သည်(:၁)။ ကယ်ရာမဲ့နေသည့် သူ၏လူမျိုးတော်အား အကြင်နာမဲ့စွာ ဆက်ဆံကြသောကြောင့် “ဒုစရိုက်အပြစ်ကို သူတို့အပေါ်သို့ သက်ရောက်စေမည်”ဟု ယေရမိမှတစ်ဆင့် ဘုရားသခင် ကြေညာခဲ့သည်(:၂)။ ကွဲလွင့်နေသည့် သူ၏သိုးစုတော် ခံစားရသည့် ဒုက္ခဝေဒနာကို ကိုယ်တော်မြင်တွေ့ခဲ့ပြီး၊ သူတို့အတွက် အလေးအနက် စိုးရိမ်ပူပန်ခဲ့သည်။ ဘုရားရှင်သည် စိုးရိမ်ပူပန်ခဲ့ရုံသာမကဘဲ သူ၏သိုးများကို ဖမ်းဆီးသိမ်းသွားခံရသောပြည်မှ အမြတ်တနိုး ပြန်လည်စုစည်းကာ ဘေးကင်းလုံခြုံပြီး ပြည့်လျှံကြွယ်ဝသောနေရာသို့ ပို့ဆောင်မည်ဟုပြောခဲ့သည်(:၃)။

လမ်းပျောက်၊ ထောင်ချောက်မိ၊ အထီးကျန်နေသည်ဟု ခံစားရသည့်အခါ ကျွန်ုပ်တို့၏ဒုက္ခကို ကောင်းကင်ဘုံရှင်အဘမြင်တော်မူပြီး၊ ကျွန်ုပ်တို့ကို အားကိုးရာမဲ့စွာ ချန်ထားခဲ့မည် မဟုတ်ပါ။ ကိုယ်တော်သည် ကျွန်ုပ်တို့အား ကယ်တင်ရန်နှင့် မူလအခြေအနေသို့ ပြန်တည်ဆောက်ပေးရန် တက်ကြွစွာ ရှာဖွေလျက်ရှိပါသည်။