အလုပ်အင်တာဗျူးတစ်ခုတွင် ကယ်ရယ်အား “အရင်အလုပ်က ဘာလို့ထွက်လိုက်တာလဲ”ဟု ထပ်ခါတလဲလဲ မေးသည်။ အင်တာဗျူးသူက ယခင်အလုပ်ရှင်နှင့် သူမတွေ့ကြုံခဲ့သည့် ပဋိပက္ခကို ခန့်မှန်းမိပြီး ဘာဖြစ်ခဲ့သည်ကို သိလိုသည်။

“အလုပ်လုပ်သည့်ပုံစံ မတူညီကွဲပြားမှုများ”ကို ကယ်ရယ် သိရှိလက်ခံသည့်အပြင် ယခင်အလုပ်ရှင်၏ မကောင်းကြောင်းပြောခြင်းသည် မှားယွင်းသည်ဟု ခံယူသဖြင့် ယခင်အလုပ်ရှင်အပေါ် သူမ၏ ထင်မြင်ချက်ကို ပြောဆိုရန် ငြင်းဆိုခဲ့သည်။ နောက်ပိုင်း သူမကို အလုပ်ခန့် လိုက်ပြီးနောက်၊ အလုပ်ရှင်သစ်က ဝန်ထမ်းခန့်အပ်ရေးတာဝန်ရှိသူများသည် သူမ၏တုံ့ပြန်မှုကို သဘောကျကြောင်း၊ “မင်းရဲ့ သမာဓိကို ငါတို့ သဘောကျတယ်။ မင်းရဲ့သူဌေးမကောင်းကြောင်းကို မပြောစေချင်သလို၊ နောင်လည်း ငါတို့မကောင်းကြောင်းကိုလည်း မပြောစေချင်ပါဘူး”ဟု ပြန်ပြောပြခဲ့သည်။

ယေရှုကို ယုံကြည်သူအသစ်တစ်ဦးအနေနှင့်၊ ကယ်ရယ်သည် လက်တွေ့ကျကျ “ဘုရားနှင့်မှန်ကန်သော”နည်းလမ်းဖြင့် မည်သို့နေထိုင်ရမည်ကို အမြဲတစေ တွေးတောခဲ့သည်။ အဖြေသည် ရိုးရှင်းကြောင်း၊ သမာဓိရှိရှိ၊ ဂုဏ်သိက္ခာရှိရှိ၊ ရိုးသားပြီး ကျင့်ဝတ်သိက္ခာရှိစွာ နေထိုင်ခြင်းဖြစ်ကြောင်း သူမသဘောပေါက်ခဲ့သည်။

၁ပေ ၂:၁၂ တွင် “ဘုရားသခင်ကြည့်ရှု စီရင်တော်မူသောနေ့ရက်၌၊ သင်တို့ ၏ကောင်းသောအကျင့်ကို သူတို့သည် ထောက်ရှု၍၊ ဘုရားသခင်ကို ချီးမွမ်းမည် အကြောင်း၊ သူတို့ရှေ့၌ တင့်တယ်လျောက်ပတ်စွာ ကျင့်နေကြလော့”ဟု အရာရာ၌ တည်ကြည်မှုရှိခြင်း၏အရေးကြီးပုံကို ထောက်ပြသည်။ ၎င်းတွင် မင်း၏အုပ်စိုးခြင်းကို ဝန်ခံခြင်း(:၁၃-၁၄)၊ ကောင်းသောအကျင့် ကျင့်ခြင်း(:၁၅)၊ နှိမ့်ချခြင်းနှင့် အစေခံခြင်း စိတ်ထားကို ပြသခြင်း(:၁၆)၊ အခြားသူများကို လေးစားချစ်ခင်ခြင်း (:၁၇) စသည့် လက်တွေ့ကျသောအမှုအရာများ ပါဝင်သည်။ ဘုရားသခင်သည် ကျွန်ုပ်တို့အား မစသည်နှင့်အမျှ၊ သူ၏နာမတော်ကို ချီးမြှောက်သောနည်းလမ်းဖြင့် ကိုယ်တော်အား အစေခံကြပါစို့။